Përpjekja për t’i fshirë të gjitha të dhënat në serverët e Doganës së Kosovës, veçanërisht për t’i eliminuar të gjitha manipulimet që janë bërë me futjen e pasaportave pa doganë, ka lënë pa punë njërin nga zyrtarët e lartë të këtij institucioni, Ali Ismaili.
Para një muaji Drejtori i Përgjithshëm i Doganës, Naim Huruglica, e ka larguar nga puna atë ngase ishte vërtetuar se ai kishte hyrë në Dhomën e Serverit, ku e kishte shkoqur dhe marrë me vete njërën nga pajisjet, e cila shërben për t’i ndezur klimat, pa të cilat serverët digjen, ndërsa të dhënat eliminohet pothuajse tërësisht.
Burime të gazetës Zëri brenda Doganës së Kosovës, kanë treguar se Ismaili ka pasur për qëllim që ta lërë këtë institucion tërësisht pa të dhëna, dhe njëkohësisht të shkaktojë rrëmujë brenda tij.
“Ismaili ka pasur për qëllim që duke i djegur serverët t’i shkatërrojë ata, dhe njëkohësisht t’i humbë të dhënat për futjen e pasaportave pa doganë dhe për vjedhjen e parave në Pejë. Ai ka dashur gjithashtu që ta sjellë drejtorin e përgjithshëm para aktit të kryer, dhe ta detyrojë Qeverinë e Kosovës që ta shkarojë atë”, tha një burim. /Indeksonline/
