Ismajli: Po mundohemi që komunitetit rom t’i sigurojmë shërbime shëndetësore në çdo shtëpi

Gjilan – Kjo vizitë i paraprinë vizitës së ditës së djeshme, ku bashkërisht, po mundohemi që këtij komuniteti t’i sigurojmë shërbime shëndetësore në çdo shtëpi, si dhe, shërbime tjera të nevojshme, furnizim me ushqim, pajisje higjienike dhe mjete tjera të nevojshme për ta tejkaluar sa më lehtë situatën pandemike ka shkruar Arbër Ismajli.

Postimi i plotë i Arbër Ismajlit

Sot, kemi vazhduar vizitat në lagjet e familjeve rome, bashkë me Drejtorin për Shëndetësi, Selami Xhemaili, Drejtorin e QKMF-së, Fejzullah Berisha, si dhe me përfaqësuesin e komunitetit rom, Fadil Demiri. Po mundohemi që t’i dalim në ndihmë dhe t’i përfshijmë pjesëtarët e këtij komuniteti, në katër lagje urbane të qytetin e Gjilanit: “Abdullah Presheva”, “Elez Agushi”, “Xhemajl Mustafa” dhe “Gyrsel Sylejmani”, si dhe në vendin e kthimit në “Gllamë”, në periferi të qytetit.

Kjo vizitë i paraprinë vizitës së ditës së djeshme, ku bashkërisht, po mundohemi që këtij komuniteti t’i sigurojmë shërbime shëndetësore në çdo shtëpi, si dhe, shërbime tjera të nevojshme, furnizim me ushqim, pajisje higjienike dhe mjete tjera të nevojshme për ta tejkaluar sa më lehtë situatën pandemike. Përgjithësisht, gjendja shëndetësore e tyre është e mirë. Me ne ishte edhe Dr. Basri Kamberi, si dhe, Inf. Valdrin Toska, ku nga ta janë bërë kontrolle dhe janë dhënë rekomandime mjekësore të nevojshme që duhen bërë. E mira e gjithë kësaj, është se brenda këtij komuniteti nuk kem asnjë rast të dyshuar apo të prekur me COVID19.

Këta banorë po vazhdojnë t’i respektojnë rregullat e dala nga institucionet. Ky komunitet meriton mbështetjen e nevojshme si dhe trajtimin e barabartë me të gjithë qytetarët. Këta janë pjesë e jona, dhe, medoemos, duhet t’ia përmbushim kërkesat dhe nevojat e tyre. Ne si institucione lokale, vazhdimisht po mundohemi t’i krijojmë hapësirën dhe kushtet e nevojshme. Jemi e vetmja komunë e cila po investojmë në arsimimin e tyre, duke iu ofruar shkollim në gjuhën rome, po iu bëjmë krijimin e kushteve infrastrukturore, si dhe ndihmën e vazhdueshme ndaj familjeve në nevojë.

Romët në Komunën e Gjilanit, jetojnë̈ tradicionalisht në vendin tonë të përbashkët dhe kanë kontribut thelbësor në shoqërinë e larmishme të saj me traditat dhe kulturën e tyre. Ne do t’i qëndrojmë pranë kurdoherë që është nevoja. Do të jetojmë bashkërisht e denjësisht, në një shoqëri të pasur multietnike, duke i ndihmuar njëri-tjetrit në çdo lloj situate, e veçanërisht, në tejkalimin e pandemisë COVID19 ka shkruar Ismajli./rajonipress/