Gjilan – Nënkryetari i Gjilanit, Arbër Ismajli me bashkëpunëtorët, ka bërë sot homazhe tek varrezat e shtatë martirëve të fshatit Llovcë, të ekzekutuar nga forcat paramilitare serbe 22 vite më parë.
Në emër të kryetarit Haziri, Ismajli ka kërkuar zbardhjen e kësaj masakre makabre në mënyrë që eshtrat e tyre pushojnë të qetë.
“Shtatë martirët e Llovcës u sakrifikuan për lirinë, pavarësinë dhe të drejtat e shqiptarëve. Ky është një përvjetor i dhimbjes, por në të njëjtën kohë edhe i krenarisë sepse falë tyre ne po e gëzojmë këtë ditë të bardhë. Kaluan 22 vite dhe akoma kjo masakër makabre mbetet e pazbardhur. Kërkojmë nga organet e drejtësisë që ta zbardhin sa më parë dhe autorët ta marrin dënimin meritor. Në këtë mënyrë, eshtrat e tyre do të pushojnë të qetë. Lavdi e përjetshme”, ka thënë Haziri.
Ismajli tha se Komuna e Gjilanit po i përkujton edhe masakrat tjera, siç është ajo e Llashticës, Zhegrës, Lladovës e vendbanimeve tjera, ku qytetarët e pafajshëm e kanë paguar në mënyrën më të ashpër dhe me sakrificën më të madhe sublime lirinë e Kosovës.
Në emër të familjeve të martirëve ka folur djali i mësuesit Rahim Ymeri, Fitimi, i cili e ka falënderuar kryetarin Komunën e Gjilanit për nderimet që u ka bërë shtatë martirëve në 22-vjetorin e masakrës.
Ndryshe, 22 vite më parë, në fshatin Llovcë u masakruan në mënyrën më barbare shtatë persona: Rahim Ymeri (arsimtar), Xhemail Halimi, Xhevrije Zeqiri, Nexhmije Azemi, Rabit Dalipi, Sami Xhelili dhe Avdi Rexhepi./rajonipress/
