Ismaili thirrje Qeverisë për rregullimin e çmimeve të barnave: Vitia të ketë guximin për parandalimin e korrupsionit

Ish-ministri i Shëndetësisë, njëherësh edhe deputet nga radhët e PDK-së, Uran Ismaili, i ka bërë thirrje Qeverisë për të marrë hapa konkret në rregullimin e Ligjit për çmimet e barnave.

“Në vitin 2019, atëherë si Ministër i Shëndetësisë e pata nënshkruar udhëzimin për këtë Ligj, që për ne dhe qytetarët ka qenë i përfunduar, por për fat të keq ky Ligj nuk u implementua kurrë. Kanë vazhduar të nënshkruhen kontrata ku barnat janë paguar deri në 2000% më shtrenjtë. Duhet të përmend se kjo Qeveri e ka futur në plan program rregullimin e këtij Ligji, por është planifikuar të ndodhë në fundvit”, ka thënë Ismaili.

Ai ka thënë se ka munguar vullneti për rregullimin e këtij ligji, andaj kjo gjendje e ka shtyrë që për herë të dytë të iniciojë rregullimin e këtij ligji.

“Kosova që sa vite ka paguar mbi 6 milionë euro më shumë për blerjen e barnave. Sa më në hall qytetarët, aq më shtrenjtë po kushtojnë barnat”, ka thënë Ismaili.

Deputeti i PDK-së i ka bërë thirrje Ministrit aktual të Shëndetësisë, Arben Vitia, që të shtyjë përpara këtë Ligj, duke i garantuar përkrahjen me qëllim që të parandalojë korrupsionin dhe keqpërdorimet me çmimet e barnave.