Ish-kryeinfermierja arrestohet me dyshimin se vodhi albumina në vlerë 27 mijë euro

Ish-kryeinfermierja e Klinikës së Kirurgjisë në Qendrën Klinike Universitare të Kosovës (QKUK), Emine Rama, është arrestuar të enjten nga Policia e Kosovës, ka bërë të ditur Prokuroria Themelore, shkruan sot Koha Ditore. Ajo dyshohet se gjatë kohës sa ka punuar në QKUK e ka dëmtuar institucionin në vlerë të 27 mijë eurove.

“Koha Ditore” në muajin prill kishte raportuar se QKUK-ja e kishte paraqitur në Komision Disiplinor me dyshimin për vjedhje, megjithatë për këto dyshime nuk e kishin lajmëruar as Policinë e as Prokurorinë e Kosovës. Policia e Krimeve Ekonomike kishte nisur këtë hetim pas raportimit të gazetës se dyshimet ndaj kësaj infermiere po trajtoheshin nga një komision i brendshëm i QKUK-së. Emine Rama dyshohet se në mënyrë sistematike ka “vjedhur” dhjetëra albumina, të cilat kishin qenë të parapara që t’u jepeshin pacientëve. Dyshohet që i ka shitur në barnatore private me vlerë për 25 euro për një albuminë.

“Koha Ditore” nga burime brenda QKUK-së kishte mësuar se vetëm për muajin dhjetor dyshohet se ajo kryeinfermiere e QKUK-së ka shmangur preparate të albuminës me vlerë rreth 4.000 euro. Pasi ka nisur hetimi, kërkesa për albumina ka rënë për 50 për qind.

Arrestimin e kësaj ish-punëtoreje të QKUK-së e ka konfirmuar kryeprokurori i Prokurorisë Themelore, Imer Beka. Ai në orët e vona të së premtes ka deklaruar se arrestimi i saj është bërë me dyshimin se e ka keqpërdorur pozitën zyrtare.

“E dyshuara është arrestuar, të enjten, pasi, sipas Policisë së Kosovës, ekziston dyshimi se në periudhën e viteve 2014-2015 me qëllim të përfitimit të kundërligjshëm, ka keqpërdorur detyrën zyrtare”, ka deklaruar ai.

http://koha.net/?id=27&l=67833