Ish-futbollisti e ekonomi, Naser Sylejmani tani një vit e gjysmë i mungon FC Dritës

Shumë njerëz jetën e tyre ja u kanë kushtuar lëmive të ndryshme, por për ish-futbollistin e ekonomin e FC Dritës, Naser Sylejmani, i cili ndërroi jetë para 16 muajve, një jetë të tërë ja kushtoi FC Dritës. Naser Sylejmani i cili ka ndërruar jetë në moshën 65 vjeçare, një kohë të gjatë ishte futbollist i kësaj skuadre, ndërsa plot 40 vite gjerë në pensionimin e tij, ai ishte ekonom në FC Drita, duke pasur një respekt të jashtëzakonshëm nga shumë gjenerata të tëra plot 40 vite.

Tifozët e FC Dritës “Intelektualët”, disa herë edhe në stadiumet futbollistike patën shpalos pankartat e tyre për mungesën e ish-futbollistit e ekonomit, Naser Sylejmani. Naseri ishte i të gjithëve, ai me punën e tij dhe me sjelljet e tij ishte shembull i qytetarit, ai kishte fituar simpati dhe dashuri tek të gjitha klubet Kosovare.

Në shenjë të respektit për punën e sinqertë që kishte bërë Naseri për 40 vite në FC Drita, zyrtarët e këtij klubi e emërojnë djalin e tij si ekonom, Shpend Sylejmanin, i cili po ec me hapa të sigurt ashtu siç ishte i sinqertë edhe prindi i tij, Naser Sylejmani. “Jam shumë krenar për prindin tim që një jetë ja kushtoi ngjyrave “bardhekaltër”. Jam krenar që babanë tim e vlerësojnë jo vetëm qyteti i Gjilanit por edhe shumë klube të Kosovës, prindi im ishte i të gjithëve, në shpirtin e tij kishte vetëm një emër e ajo ishte FC Drita. Jam shumë i nderuar dhe krenar prej zyrtarëve të klubit të FC Dritës e tifozëve më të mirë në botë “Intelektualëve”, për respektin që kanë ndaj prindit tim, e unë këtë respekt do të mundohem t’jua kthej me tërë zemrën time, pasiqë emri i FC Dritës është një familje e madhe e pa fundme”, ka bërë të ditur djali i Naserit, Shpend Sylejmani./rajonipress/