Ish-ambasadori, Bosch: Marrëveshja në të mirë të Kosovës, Kurti duhet t’i dëgjojë më shumë ndërkombëtarët

Ish-ambasadori i Holandës në Kosovë, Robert Bosch, në një prononcim për IndeksOnline ka folur për mundësinë e arritjes së marrëveshjen së shumëpritur mes Kosovës dhe Serbisë si dhe për liberalizimin e vizave.

Sipas Bosch, skema e marrëveshjes është shumë premtuese, por që problemet janë në detaje.

“Ideja është e njëjtë me marrëveshjen në atë kohë midis BRD dhe DDR. Ata nuk e njihnin njëri-tjetrin de jure por de facto e njohën. Tani që Vuçiq po tërhiqet nga kjo pjesë thelbësore e marrëveshjes, heq të gjithë arsyen për të bërë një marrëveshje të tillë. Serbia tani pretendon se Asociacioni duhet së pari të vijë dhe të jetë në formë siç ishte rënë dakord (gabimisht) nga palët në vitin 2013-2015. Por, Gjykata Kushtetuese e Kosovës i shpalli disa pika të marrëveshjes antikushtetuese dhe përshkroi përmirësime”, ka deklaruar ish ambasadori holandez.

Ai ka thënë se Serbia nuk ka asnjë bazë gjyqësore apo morale për ta detyruar Kosovën të shkojë kundër kushtetutës së saj.

Ish-ambasadori për IndeksOnline ka shtuar se nëse marrëveshja zbatohet është në të mirë të Kosovës.

“Është e qartë se marrëveshja është në favor të Kosovës nëse zbatohet, me kusht që marrëveshja të jetë sipas aktgjykimit të Gjykatës Kushtetuese”, tha ai.

Ndër tjerash, Bosch komentoi edhe sjelljen e presidentit të Serbisë dhe kryeministrit të Kosovës në këto takime.

Ai tha se Vuçiqit i mungojnë cilësitë e shtetarëve, ndërsa për Kurtin vlerësojë se duhet të dëgjojë më shumë ndërkombëtarët.

“Për sjelljen e Vuçiqit, ai tregon mungesë kronike guximi dhe tregon gjithashtu se i mungojnë cilësitë e shtetarëve. Kurti ka qenë i fortë, por ndonjëherë duhet (për fat të keq) të dëgjojë më shumë miqtë e huaj të Kosovës”, ka thënë Bosch.

Ai për fund theksojë se vendimi për heqjen e vizave për Kosovën është shumë i vonuar dhe e konsideron të paarsyeshëm të pritet deri në 2024.

“Liria e vizave është shumë e vonuar dhe nuk shoh arsye pse kosovarët do të duhet të presin deri më 1 janar 2024. Pse jo 1 prill? Kosova është pas Malit të Zi më pak e korruptuar”, ka përfunduar ish-ambasadori./IndeksOnline/