Ischinger i shqetësuar me situatën në veri: A është e vetëdijshme Serbia se nxitja e dhunës e pamundëson procesin e anëtarësimit në BE

Ish-emisari gjerman në bisedimet Kosovë-Serbi, Wofgang Ischinger është shprehur i shqetësuar me situatën e tensionuar në veri të vendit.

Ai në një postim në Twitter shkruan se veprimi i Bashkimit Evropian është urgjent, ndërsa shtron pyetjen nëse Serbia është e vetëdijshme që nxitja e dhunës në Kosovë do ta bënte të pamundur vazhdimin e procesit të anëtarësimit në BE.

“Thellësisht i shqetësuar për tensionet e vazhdueshme. Veprimi/roli vendimtar i BE-së urgjent. A është vënë në dijeni Serbia se nxitja e dhunës në shtetin fqinj, Kosovën, do ta bënte të pamundur vazhdimin e procesit të anëtarësimit në BE”, shkruan Ischinger, raporton Telegrafi.

Deeply concerned about continuing tensions. Decisive EU action/role urgent. Has Serbia been made aware that inciting violence in neighboring state Kosovo would make continued EU accession process impossible? @vonderleyen @JosepBorrellF https://t.co/yzHuaLwzbq

Lidhur me gjendjen e sigurisë në veri dhe vendosjen e barrikadave të enjten mbajti një konferencë për media, ministri i Punëve të Brendshme, Xhelal Sveçla, i cili tha se barrikadat në veri kanë humbur kuptimin.

Ndërkaq, komandanti i KFOR-it Angelo Michele Ristuccia të premten në mbrëmje tha se duhet të shmanget shfaqja provokuese e forcës dhe zgjidhja duhet përmes dialogut.

Gjenerali Ristuccia thotë se ai mbetet në kontakt të ngushtë me të gjithë ata që janë përfshirë në këtë proces.

“Është e rëndësishme që të gjithë të përfshirët të shmangin çdo retorikë apo veprim që mund të shkaktojë tensione dhe të përshkallëzojë situatën. Ne presim që të gjithë aktorët të përmbahen nga shfaqjet provokuese të forcës dhe të kërkojnë zgjidhjen më të mirë për të garantuar sigurinë dhe sigurinë e të gjitha komuniteteve”, thuhet në komunikatën e komandantit të KFOR-it. /Telegrafi/

Shpërndaje.
© RAJONIPRESS