Isa Mustafa kryetar, Vjosa Osmani as në garë

Isa Mustafa, edhe katër vitet të ardhshme do të mbajë pozitën e të parit të Lidhjes Demokratike të Kosovës. Zgjedhja e kryetarit të LDK-së është bërë të dielën në Prishtinë në kuadër të Kuvendit të tetë zgjedhor. Ai është zgjedhur në këtë post me aklamacion dhe atë duke e marrë miratimin e shumicës së delegatëve, 355 sa numëron Lidhja Demokratike e Kosovës. Vetëm dy duar janë ngritur për ta kundërshtuar zgjedhjen e Mustafës për postin e kryetarit të Partisë.

Kundër Isa Mustafës në kandidaturë ka dalë vetëm Vjosa Osmani. Mirëpo, ajo nuk e ka marr mbështetjen e delegatëve duke i pamundësuar kandidaturën e saj për kryetare të hidhet në votim. Konform statutit të partisë, Osmani është dashur që të marrë miratimin e 50 për qind të delegatëve për t’i hyrë garës kundër Isa Mustafës. Vetëm 62 delegatë e kanë mbështetur Osmanin për të hyrë në garë dhe për shkak të numrit të pamjaftueshëm, ajo nuk ka mundur të hyjë. Vjosa Osmani dhe ish-presidenti Fatmir Sejdiu e kanë lëshuar sallën ku po mbahej Kuvendi.

Osmani e ka kritikuar procesin, ndërkohë që Sejdiu është rikthyer në Kuvend teksa po zgjidhej Këshilli i Përgjithshëm i Partisë. Madje është listuar si i pari në mesin e anëtarëve të Këshillit të Përgjithshëm që i ka 98 delegatë plus kryetari i partisë. Në Këshill të Përgjithshëm nuk kanë arritur që të futen shumica e atyre që e kanë kundërshtuar kandidaturën e Mustafës për kryetar: Arben Gashi, Vjosa Osmani, Alma Lama, Haxhi Avdyli, Naser Rogova. Nga grupi i kundërshtarëve të Mustafës vetëm Armend Zemaj është futur në Këshill të Përgjithshëm./zeri/