Isa Mustafa hap faqe në Facebook

Isa Mustafa do t’u ofrohet simpatizuesve edhe me një faqe në rrjetin social Facebook, e cila është hapur dje. Në profilin e kryetarit të LDK-së dhe të Komunës së Prishtinës është shkruar se në këtë mënyrë ai synon që të krijojë kontakte të vazhdueshme me qytetarët.

“Andaj mos ngurroni të më shkruani. Pres me padurim të bisedojmë se bashku. Ju lutem që faqen ta shpërndani me miqtë dhe familjarët tuaj”, ka shkruar Mustafa.

Në postimet e para është një fotografi e Mustafës me ish-presidentin, Ibrahim Rugova. “Një moment shumë i veçantë me Presidentin Rugova, arkitektin dhe themeluesin e Republikës së Kosovës”, është komenti.

Zëdhënësi i Komunës së Prishtinës, Asdren Osaj ka konfirmuar për Telegrafin se kjo faqe është zyrtare, ndërsa menaxhohet kryesisht nga aktivistë të Forumit Rinor të LDK-së.

Hapja e faqeve në rrjetet sociale është trend i politikanëve, sidomos i atyre në moshë të re. Shpesh rrjetet sociale bëhen fushëbetejë e debateve verbale ndërmjet tyre. Zakonisht gjuha e përdorur është më pak zyrtare.