Isa Mustafa e shndërroi LDK-në në parti pa vizion

LDK-ja në Zvicër kundërshton koalicionin LDK-AAK-NISMA-VV. Kërkohet dorëheqja e kryetarit të LDK-së.

“Në vend që kryetari i LDK-së, Isa Mustafa, të jepte dorëheqje konform përgjegjësive politike dhe deklaratave publike, ai edhe më tutje po vazhdon aventurat e tij të njohura në dëm të LDK-së dhe në dëm të vetë Kosovës”, thuhet në deklaratën e LDK-së në Zvicër.

Nëpërmjet një deklarate për shtyp, Kryesia e Degës së LDK-së në Zvicër, mori vendim që pas certifikimit të rezultateve të dalë me një deklaratë publike, në të cilën do të kërkojë përgjegjësitë nga kryetari dhe Kryesia e LDK-së për humbjet e zgjedhjeve si dhe do të shpreh qëndrimin kundër koalicionit LDK-AAK-NISMA.

Në këtë deklaratë dërguar anëtarëve të Këshillit të Përgjithshëm, Kryesisë së LDK-së dhe kryetarit të kësaj partive, Isa Mustafa thuhet se anëtarët e Kryesisë së Degës së LDK-së në Zvicër, me vëmendje dhe shqetësim i kanë përcjellë zhvillimet politike në Kosovë, veçmas ato të pas zgjedhjeve të 8 qershorit 2014, me ç’rast edhe shprehin indinjatën e thellë për humbjen e LDK-së në këto zgjedhje dhe për papërgjegjësinë që ka Kryesia e LDK-së dhe kryetari, Isa Mustafa, të cilët nuk janë në gjendje që të marrin përgjegjësinë për humbjen e zgjedhjeve për pushtetin qendror. “Në vend që kryetari i LDK-së, Isa Mustafa, të jepte dorëheqje konform përgjegjësive politike dhe deklaratave publike, ai edhe më tutje po vazhdon aventurat e tij të njohura në dëm të LDK-së dhe në dëm të vetë Kosovës”, thuhet në këtë deklaratë.