IPK suspendon dy zyrtarë policorë në Gjilan pas publikimit të një videoje të dyshuar për tejkalim të autorizimeve

Gjilan – Dy zyrtarë policorë në Gjilan, Asdren Hasani dhe Gentrit Agushi, janë suspenduar nga detyra pas një vendimi të ndërmarrë nga Inspektorati Policor i Kosovës, nën dyshimet për tejkalim të autorizimeve zyrtare.

Rasti ka marrë vëmendje të gjerë publike pas publikimit të një videoje në rrjetet sociale, në të cilën shihen persona të uniformuar duke u përfshirë në një incident fizik me një qytetar. Pamjet kanë nxitur reagime të shumta dhe kanë shtyrë autoritetet kompetente të ndërmarrin veprime hetimore.

Sipas informacioneve fillestare, suspendimi është masë administrative që ndërmerret për të mundësuar zhvillimin e paanshëm të procedurave hetimore dhe për të sqaruar rrethanat e rastit.

Videoja e publikuar ka shkaktuar shqetësim në opinionin publik në Gjilan, ndërsa qytetarë të ndryshëm kanë reaguar në rrjetet sociale duke kërkuar zbardhjen e plotë të rastit dhe përgjegjësi institucionale nëse konstatohen shkelje ligjore apo profesionale.

Autoritetet pritet të dalin me detaje shtesë pas përfundimit të hetimeve, ndërsa rasti mbetet nën trajtim nga organet kompetente. Në përputhje me parimin e prezumimit të pafajësisë, zyrtarët e suspenduar konsiderohen të pafajshëm derisa të provohet e kundërta me vendim të formës së prerë nga institucionet përkatëse./rajonipress/