Ipeshkvi i Kosovës dhe Serbia reaguan “bashkë”

Fjalimi i kryeministrit turk, Recep Tayyip Erdogan në Prizren ngjalli reagime të shumta. Të menjëhershme ishin reagimet që vinin nga Serbia e që haptazi akuzuan kryeministrin e Turqisë për deklaratën e tij bërë në Prizren “Turqia është Kosovë, Kosova është Turqi”, për prishtje të marrëdhënieve miqësore mes dy vendeve. Por, jo vetëm Serbia reagoi ndaj kësaj deklarate.

Ishte e menjëhershme edhe deklarata e Ipeshkvit të Kosovës, Imzot Dodë Gjergjit, i cili ashpër reagoi ndaj kësaj deklarate, të cilën madje e krahasoi edhe me fjalimin e Slobodan Milosheviçit bërë në Fushë Kosovë pak para fillimit të fushatës së tij të krimeve jonjerëzore kundër shqiptarëve në Kosovë, edhe pse Erdogan njihet si njëri nga përkrahësit më të mëdhenj të shtetësisë së Kosovës.

Me anë të këtij reagimi Ipeshkvia thotë se ka përfaqësuar qëndrimin e tij personal e jo të Vatikanit.
“Qëndrimi i Imzot Dode Gjergjit, është qëndrim i një shqiptari, nuk ka të bëjë fare këtu Vatikani”, u tha për Indeksonline me anë të telefonit nga Ipkshevia e Kosovës.

Ndërsa Don Lush Gjergji, i kontaktuar nga Indeksonline, sapo kuptoi se për çfarë është pyetja, nuk dha kurfarë përgjigje dhe e mbylli telefonin e tij, duke mos qartësuar faktin nëse Ipeshkvia e Kosovës ka të drejtë të bëjë deklarata të tilla politike pa u konsultuar me Vatikanin, dhe nëse secila deklaratë e Ipeshkvisë përfaqëson edhe qëndrimin e Vatikanit zyrtar.

Nga ana tjetër, qëndrimin e Imzot Dodë Gjergjit e ka përkrahur edhe Partia Demokristiane e Kosovës, më saktësisht kryetari i kësaj partie, Ukë Berisha.