Investitorët e huaj rrisin borxhin e Kosovës

Me paratë që i fitojnë në Kosovë duhet t’i lajnë borxhet në bankat apo institucionet tjera financiare prej nga vijnë. Kështu shpresat se do të rritet paraja e gatshme në Kosovë nga investimet e huaja janë të pakta. Përkundrazi ata po ndikojnë vetëm në rritjen e borxhit të jashtëm të Kosovës.

Sipas Raportit të fundit të Bankës qendrore të Kosovës (BQK), në gjashtëmujorin e parë të këtij viti borxhi i jashtëm i Kosovës arriti vlerën 1.5 miliard euro, apo 9 për qind më i lartë sesa në periudhën e njëjtë të vitit paraprak. Pjesa më e madhe e borxhit përbëhet nga sektori privat me 1.1 miliard euro, apo me 74 për qind të borxhit të jashtëm bruto të Kosovës.

“Pjesa më e madhe e borxhit privat është në formë të kredive ndërmjet kompanive që janë në relacion të investimeve të huaja direkte (612.4 milion euro) e pasuar nga huamarrjet e bankave komerciale (183 milionë euro). Sektorët e tjerë të ekonomisë (institucionet financiare jobankare, korporatat jofinanciare, organizatat joqeveritare dhe ekonomitë familjare), në fund të tremujorin e parë të vitit 2013 kanë pasur një borxh bruto prej 324.1 milion euro. Në këto kategori dominojnë kreditë tregtare të kompanive kosovare importuese të mallrave”, thuhet në raportin e BQK-së…(më Tribuna).