Investimi më i madh në energjetikë vije nga Zvicra

Gjilan – Mbi 10.5 milion euro është investimi i shtetit zviceran në trafostacionin e njohur si “Gjilani 5” tha Fadil Osmani. Azem Mujku thotë se Gjilani e ka zgjidhur problemin e furnizimit me energji për 50 vitet e ardhshme.

Investimi në trafostacionin energjetik i njohur si “Gjilani 5”, llogaritet si investimi me vlerën më të madhe në rajonin e lindjes. Kështu thotë për rajonipress Fadil Osmani menaxher në zyrën e projekteve në Gjilan. Osmani tha se ky investim vije nga shteti zviceran dhe ka një kosto prej 10.5 milion eurove.

Kurse Azem Mujku nga drejtoria e shërbimeve publike thotë se ky investim e zgjidhë problemin e rrymës dhe të furnizimit me energji elektrike. “Realisht ky trafostacion i 110/20 KV e stabilizon Gjilanin për 50 vitet e ardhshme”.

Mujku thotë se ky investim e furnizon gjysmën e Gjilanit dhe është një nyje rajonale ose autostradë e rrymës. “Nga ky investim tani e tutje Gjilani nuk mund të mbetet pa rrymë sepse i ka të hapura dhe të lidhura të gjitha nyjat përçuese prej nga mund të furnizohet me energji elektrike”.

Sipas Mujkut ky trafostacion pritet që brenda pak ditësh edhe të futet të funksion

Ndryshe ky projekt është nisur në vitin 2008 dhe qëllim kryesor ka pasur përmirësimin e sektorit të energjisë në Komunën e Gjilanit . Në aktin e nënshkrimit të memorandumit me Qeverinë zvicerane atë kohë ish ministrja e Energjisë dhe Minierave, Justina Shiroka Pula e patë cilësuar këtë projekt si shumë të rëndësishëm për rajonin e Gjilanit. “Kemi të bëjmë me një projekt shumë të rëndësishëm për rehabilitimin e infrastrukturës në sektorin e energjisë, në ndërtimin e nënstacionit Gjilani .”/rajonipress/