Investimet në duart e mafisë politike

Sundimi i partive të mëdha, rrënues për ekonominë. Nga viti në vit është përkeqësuar ambienti biznesor

“Të investosh sot në Kosovë, me këtë klasë sundimtarësh, është shumë e vështirë, sepse menjëherë porsa të mbërrijë një investitor i huaj, por edhe investitor vendor, ai do të mësojë se shumica e bizneseve të mëdha janë mafiopolitikanët dhe mafiooligarkët e tyre të lidhur me ta, dhe se pa lejen e aminin e tyre nuk mund të bëjnë asgjë”, thotë deputeti Enver Hoti

Me gjithë premtimet e bëra nga Qeveria ‘Mustafa-Thaçi’, se kanë bërë ndryshime të mëdha pozitive në përmirësimin e klimës dhe bërjes së biznesit për joshjen e investitorëve të huaj, rezultatet dhe të dhënat zyrtare e tregojnë të kundërtën.

Kosova ende vazhdon të jetë pa ndonjë imazh pozitiv dhe mirëbesimi karshi investitorëve të huaj. Ndonëse u bënë tetë vite që kur jemi bërë shtet i pavarur, ekonomia kosovare është ende e brishtë dhe gjendet në një fazë të hershme të zhvillimit të saj, dhe se problemin më të madh e ka me deficitin e vazhdueshëm tregtar, prodhimin e ulët, papunësinë, ekonominë informale, varësinë nga remitancat, etj.

Statistikat tregojnë se me të marrë timonin e shtetit autoritetet vendore, investimet e huaja kanë shënuar rënie drastike. Një vit para se të shpallej pavarësia më 2007, investimet kanë qenë në vlerën prej 440 milionë eurove, në 2008 – 370 milionë euro, 2009 – 295 milionë euro, 2010 – 368 milionë euro, 2011 – 384 milionë euro, 2012 – 229 milionë euro, 2013 – 280 milionë euro, 2014 -151 milionë euro, ndërkaq për vitin 2015 ato është thënë se kanë qenë në vlerën prej 270 milionë eurove./kosova sot/