Interesim i madh i të rinjve kamenicas për ese

Gjilan – OJQ “ NISA” përkrahur dhe financuar nga Departamenti i Rinisë në Ministrinë e Kulturës, Rinisë dhe Sportit, ka mbajtur punëtorinë me nxënës të shkollave të mesme të Gjimnazit “ Ismail Qemali” dhe Shkollës së Mesme të Lartë Profesionale “Andrea Durrsaku” me temën : “Eseja – format e esesë dhe pjesëmarrja në një konkurs eseje”.

Shefik Kastrati përfaqësues i OJQ “ NISA” theksoi se projekti është financuar për të përkrahur aktivitetet letrare, poetike dhe të pikturës me nxënës të shkollave të mesme. Ky projekt parasheh mbajtjen e disa punëtorive me tema të ndryshme, orë letrare, ekspozita artistike të cilat do të organizohen gjatë muajit nëntor dhe dhjetor.
“ Punëtoria e parë me temë: Eseja dhe format e saj u nda në dy faza . Në fazën e parë nxënësit u përqendruan në pyetjet: për kë shkruajmë dhe si të shkruajmë, dhe në fazën e dytë nxënësit punuan në pyetjet: eseja- ndërtimi i saj, hyrja, fjalia kryesore, paragrafët dhe përfundimi i esesë.

Punëtoria është bërë në punë grupore dhe ishe mjaft interaktive “ ka thënë Kastrati, duke shtuar më tej se kohëve të fundit konkurset për ese janë bërë aq të shpeshta kështu që nxënësit që morën pjesë në këtë punëtori me njohuritë e tyre, nuk do të hezitojnë të marrin pjesë prapë e pse mos të zënë edhe ndër vendet e para.

Trajnerë të punëtorisë ishin profesorët e gjuhës dhe letërsisë shqipe Jahja Dërmaku dhe Nazim Jakupi./rajonipress/