Inteligjenca të zgjohet nga gjumi

Republika në udhëkryqin e degradimit.Shoqëria ka nevojë për alternativa të reja

“Vetëm kur të ngrihet një klasë e re politike e inteligjencës së painkriminuar, vetëm atëherë përfundon kjo anarki dhe ndërtohet një demokraci e pastër me njerëz që nuk janë as nuk kanë qenë pjesë e kësaj anarkie të deritanishme dhe oligarkie kriminale”, tha Blerim Burjani për “Kosova Sot”

Beteja e pakompromis për pushtet, që po zhvillohet në spektrin politik të Kosovës, fillimisht me ngërçin 6 mujor pas zgjedhjeve të qershorit të vitit 2014, dhe tani në një krizë të re politike të imponuar nga opozita parlamentare për plot 7 muaj rresht, por që nuk po rezulton me marrëveshje të sinqertë për një alternativë serioze në funksion të interesit të përgjithshëm, sipas analistëve politikë, imponon nevojën e aktivizimit të inteligjencës së pasivizuar kosovare. Mbizotëron një vlerësim i përgjithshëm i analistëve dhe i përfaqësuesve të shoqërisë civile se kjo klasë politike, në pozitë dhe opozitë, ka arritur kulmin e degradimit dhe të humbjes së plotë të besimit qytetar.

Derisa klasa politike në pushtet është piramida e krimit dhe e korrupsionit, opozita e bashkuar është para vetëvrasjes politike me mashtrimin që u bëri qytetarëve të Kosovës dhe pamundësinë e dakordimit për një platformë të përbashkët për ndryshime, prandaj ndërtimi i një alternative të re politike është borxh që inteligjenca, deri tani e fjetur kosovare, ia ka borxh qytetarit të Kosovës .“Gjendja katastrofale e krijuar në vend, si pasojë e një lidershipi të papërgjegjshëm, ka bërë që populli të mos u besoj më. Si pasojë e kësaj, viteve të fundit kemi rënie drastike të numrit të votuesve në zgjedhje, sepse qytetarët nuk kanë më për kënd të votojnë. Në mendjen e popullit është krijuar bindja së kush më pak e kush më shumë, të gjithë që merren më politikë, janë mashtrues e intrigantë, janë hajna…kusarë politikë”, tha analisti politik Florim Zeqa për “Kosova Sot”.

Qytetarët kanë vullnet për ndryshim

Zeqa ka pohuar se liderët e tanishëm të partive politike, pa përjashtim, nuk kanë asgjë të përbashkët me qytetarët e vendit, për shkak se mendjen e kanë te pasuria dhe te milionat e tyre të deponuar në bankat jashtë vendit, ndoshta edhe në “Parajsën Fiskale” në Panama, derisa elektoratin e tyre e përdorin vetëm si objekt përgjatë fushatave zgjedhore, sa për t’ua grabitur votën, ndërsa gjitha pazarllëqet i bëjnë mes vete dhe me ndërkombëtarët./kosova sot/