Institucionet përkujtojnë Betejën e Zhegocit

Gjilan – Në Komunën e Gjilanit, sot nën organizimin e institucioneve shtetërore nga niveli qendror dhe ai lokal, është përkujtuar Beteja e Zhegovcit, në të cilën kryeministri Ramush Haradinaj dhe kryesuesja e Kuvendit të Gjilanit, Shpresa Kurteshi-Emini, kanë potencuar se dëshmorët dhe të rënët në luftën për liri kanë bërë që ne sot të jetojmë të lirë e të punojmë për shtetësinë dhe zhvillimin e vendit.

“Dhimbja për të gjitha familjet e dëshmorëve dhe martirëve është e pa harruar në asnjë moment, por, pa këto rënie të dëshmorëve, heronjëve e martirëve nuk do të ishim këtu ku jemi. Prandaj, së bashku me të gjitha familjet të cilat kanë dhënë më të dashurit e tyre për liri, shprehim lavdinë dhe respektin maksimal për të gjithë të rënët”, ka thënë kryeministri Haradinaj, në fjalën e rastit.

Kurse, kryesuesja e Kuvendit të Komunës së Gjilanit, Shpresa Kurteshi-Emini, ka thënë se është një ritakim në 20 vjetorin e Betejës së Zhegocit, për të rikujtuar të gjithë të rënët për liri dhe reflektimin për punë dhe angazhime maksimale për zhvillimin e Kosovës.
“Ne do të nderojmë në vazhdimësi të gjithë të rënët për liri. Kujtojmë dhe përulemi para të gjithë të rënëve që nga foshnja e deri te të moshuarit, të cilët dhanë jetën e tyre që ne sot të jetojmë të lirë. Amaneti i dëshmorëve dhe të rënëve për liri, është detyrë për të gjithë ne që të punojmë më shumë dhe ta bëjmë Kosovën shtet me rrugën e fuqishme drejtë integrimeve euroatlantike, zhvillimit ekonomik dhe ndërtim të sigurisë për të gjithë qytetarët pa dallime”, ka thënë mes tjerash kryesuesja Kurteshi-Emini.

Ndryshe, përfaqësuesit e institucioneve lokale kanë bërë sot homazhe tek varrezat e dëshmorëve, ndërkaq në lagjen “Dardania” janë zbuluar bustet e dëshmorëve, Tefik e Hanumshahe Zymberi./rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).