Inspektori i ndërtimit akuzohet për shpërdorim të detyrës zyrtare

Gjilan- Prokuroria Komunale në Gjilan ka ngritur propozim akuzë pranë Gjykatës Komunale në Gjilan, kundër të pandehurit Baki Azemi, inspektor ndërtimi në Komunën e Gjilanit, pasiqë dyshohet se i pandehuri ka kryer veprën penale shpërdorim i pozitës zyrtare ose i autorizimit.

Sipas propozim akuzës që e ka ngritur prokurori Esat Ademi i dyshuari Baki Azemi gjatë vitit 2011, në lagjen “Arbëria” në Gjilan, me qëllim të përvetësimit të kundërligjshëm të dobisë pasurore për vete, i pandehuri ka shpërdorë pozitën e tij zyrtare, në atë mënyrë që edhe pse e ka takuar qytetarin Z. I. duke ndërtuar dy shtëpi pa leje ndërtimi, nuk ka ndërmarrë veprime, për të cilat sipas ligjit ka qenë i detyruar t’i ndërmarrë, nuk ka lëshuar asnjë procesverbal, vërejtje mbi inspektimin e bërë dhe ndalimin e punimeve pa leje ndërtimi.

Qytetari Z. I. ka ndërtuar dy shtëpi pa leje, duke i’u shmangur taksave për leje ndërtimi, në shumë prej 2600 eurosh, vlerë për të cilën është dëmtuar buxhetit komunal i Gjilanit .

Pas seancës se mbajtur dhe shtjellimit të provave, prokuroria i ka propozuar gjykatës që të pandehurin ta shpallë fajtor për veprën për të cilën akuzohet dhe të njëjtit t’i shqiptoj dënimin sipas ligjit thuhet në propozim akuzë./rajonipress/