Iniciativa qytetare: Rruga e Zarbicës, të mbajë emrin e Doktor Ilazit

Organizata joqeveritare “Guri i Zi”, me seli në Bujanoc, mbështet iniciativën e qytetarëve të Malësisë së Bujanocit, që rruga rajonale Muhoc-Zarbincë, të mbajë emrin e humanistit dhe atdhetarit të devotshëm Dr. Ilaz Selimi, si dhe të vendoset pllaka me emrin e tij.

Kontributi i Doktor Ilazit, për rrugën e Zarbicës, është i pashoq, ai shiti pasurinë private për ta mbajtur gjallë qarkullimin e kësaj vije rrugore me dekada për malësorët e Bujanocit.

Prandaj, nuk ka ndonjë emër tjetër, që mund të zëvendësoj emrin e këtij veprimtari të palodhshëm, jo vetëm të Malësisë së Bujanocit, por edhe më gjerë. Çdo iniciativë tjetër anësore, që mund të vijë nga individë e grupe të tjera të interesave partiake a shoqërore, për t’ia lënë emrin Rrugës Muhoc-Zarbicë, është e pakuptimtë, jo logjike dhe jo e ndershme.

Organizata joqeveritare “Guri i Zi”, merr vesh se të dielën, më 10.01.2021, në Zarbicë qenka një takim, në të cilën do të vendoset pllakë me emrin e rrugës Dr.Ilaz Selimi të cilën e përkrahim fuqishëm.

Askush nuk i konteston emra tjerë të cilët kanë dhënë ndihmesën e tyre në asfaltimin e shumëpritur të kësaj rruge, një projekt kapital e jetik për banorët e Malësisë së Bujanocit, është bërë me paratë e donatorëve, pushtetit lokal dhe qendror, por jo me paratë e xhepit të tyre.

Organizata joqeveritare “Guri i Zi”, për t’i dhënë fund këtyre kalkulimeve dhe manipulimeve rreth emërtimit të Rrugës Muhoc-Zarbicë, kërkon që të përkrahet iniciativa e qytetarëve të Malësisë, të cilët jetojnë atje e që dëshira e tyre është kësaj rrugë të ketë emrin e Dr Ilaz Selimit.

Organizata joqeveritare “Guri i Zi”, duke mbështetur iniciativën e banorëve të Malësisë së Bujanocit për emërtimin e rrugës, kërkon nga Kuvendi Komunal i Bujanocit, sa më parë të aprovoj një kërkesë të tillë, ngase çdo emërtim tjetër do të shpallet “non grata!”.

Fatmir Sopi, kryetar i OJQ “Guri i Zi”

Shpërndaje.
© RAJONIPRESS