Iniciativa e presidentit Thaçi është e qëlluar

Profesori i së Drejtës Penale, Ismet Salihu, e ka mirëpritur iniciativën e presidentit të vendit për zbardhjen e krimeve para, gjatë dhe pas luftës në Kosovë.

Në këtë intervistë dhënë për gazetën “Epoka e re”, ai ka thënë se kjo kërkesë ka për qëllim rritjen e efikasitetit të punës së organeve të drejtësisë.

“Mendoj se kërkesa e presidentit Hashim Thaçi është e qëlluar për shkak se me këtë ftesë apo iniciativë në një mënyrë sajohet dhe konsolidohet një frymë e re politike dhe një vullnet politik për punë më efikase të organeve të drejtësisë në hulumtimin dhe në zbardhjen e krimeve të cilat janë kryer para luftës, gjatë luftës dhe pas luftës”, ka deklaruar Salihu.

Megjithatë, ai është shprehur i pakënaqur me punën e deritanishme të sistemit të drejtësisë por, sipas Salihut, tash ka filluar një fazë e re, e cila premton se në të ardhmen do të jetë më efikase në hulumtimin, zbardhjen dhe ndëshkimin e kryerësve të krimeve gjatë dhe pas luftës. “Marrë në përgjithësi, nuk jam i kënaqur, por kjo gjendje e sistemit të drejtësisë është rrjedhojë e situatës politike, ekonomike, sociale, juridike dhe arsimore në vend. Efikasiteti i drejtësisë varet duke u nisur prej përgatitjes profesionale, përgjegjësisë etike dhe morale si dhe prej mungesës së llogaridhënies. Këto nuk kanë qenë në nivelin e duhur. Për këtë arsye nuk jemi të kënaqur me efikasitetin, azhuritetin dhe cilësinë e këtij sistemi”, ka theksuar ai, duke shtuar se ka pasur interferim të politikës në drejtësi dhe, sipas tij, kjo është e dëmshme. “Është fakt se ka pasur interferim të politikës në sistemin e drejtësisë, sidomos në rastin e emërimeve në poste të larta. Kjo nuk është e mirë dhe është shumë e dëmshme. Por, si parakusht elementar për një sistem juridik, profesional dhe efikas, sistemi i drejtësisë duhet të jetë i ndarë prej legjislativit dhe ekzekutivit”, është shprehur Salihu.