Janë bërë më shumë se dy vite që nga regjistrimi i dy rasteve të para pozitive me koronavirus në Kosovë. Gjendja me COVID-19, sipas drejtorit të Infektivës, është e qetë, ndërsa infektologu Hamdi Ramadani nuk e përjashton mundësinë e një vale të re.
Sot, gjatë 24 orëve, u regjistruan vetëm tri raste të reja, ndërsa aktualisht janë 26 raste aktive.
Si të qetë e vlerëson gjendjen me COVID-19 drejtori i Klinikës Infektive, Arben Vishaj.
“Për momentin nuk kemi pacientë të spitalizuar me COVID-19, pra gjendja është e qetë. Jemi duke e përcjellur me vëmendje situatën epidemiologjike”, tha Vishaj për Express.
Lidhur me këtë çështje, për Express, ka folur edhe infektologu Hamdi Ramadani.
Ai thotë se rënia e rasteve të reja nuk nënkupton që “pandemia është asgjësuar ose zhdukur”.
“COVID-19 është ende i pranishëm ende në Kosovë. Mirëpo, mendoj që edhe përkundër të dhënave që kemi ditët e fundit, që janë numra të vogël të rasteve pozitive, kjo nuk nënkupton që pandemia është asgjësuar ose zhdukur. Përkundrazi këtë kohë ne duhet ta marrim si situatën më të mirë të mundshme të që vaksinohemi”, tha Ramadani.
Infektologu nuk e përjashton mundësinë e shpërthimit të një vale të re.
“Meqë nuk e kemi arritur nivelin e kënaqshëm vaksinimit dhe imunizimit me dozën e tretë dhe të katërt, të cilat janë të sigurta dhe efikase, atëherë është mundësia e madhe për shpërthimin e një vale të re të koronavirusit”, tha ai. /GazetaExpress/
