Në Kosovë tashmë zyrtarisht janë regjistruar nëntë rastet e para të infektimit me variantin “Omicron” të coronavirusit.
Sipas Ministrisë së Shëndetësisë në fuqi do të mbesin masat e tanishme, por nëse rriten numrat mund të ketë ashpërsim të kufizimeve.
“Aktualisht në fuqi janë disa masa të cilat duhet të zbatohen në përpikëri dhe të vazhdojë vaksinimi i plotë, ndërsa në varësi prej aspekteve që u theksuan më lartë, Komisioni jep rekomandime nëse masat në fuqi janë të mjaftueshme, apo duhet ndryshuar diçka, qoftë në drejtim të shtrëngimit apo lirimit të tyre. Pra çdo lirim i masave lidhet me zbatimin e tyre dhe vaksinimin”, thuhet në përgjigjen e Ministrisë për RTV Dukagjinin.
Nga ana tjetër infektologu Shemsedin Dreshaj ka ngritur alarmin se Kosova prin në rajon sa i përket infektimeve me variantin Omicron.
“Me paraqitjen e nëntë rasteve me Omicron, kjo nënkupton se Kosova prin në regjion me infektimet nga varianti Omicron. Realisht Ministria e Shëndetësisë bashkë me ekipet e saj do të duhet të marrin masa për të parandaluar përkeqësimin e situatës”, deklaroi Dreshaj, përcjell Telegrafi.
Infektologu Dreshaj i cili është edhe deputet i AAK-së në Kuvendin e Kosovës thotë se nga mesi i shkurtit mund të ketë shtim të rasteve me coronavirus në Kosovë.
Ndwrkohë, drejtori i Klinikës Infektive në QKUK, Arben Vishaj ka thënë se gjatë së martës do të ketë më shumë detaje në lidhje me situatën epidemiologjike në vend./Telegrafi/
