Ideja e Pacollit, e vetmja për ringjalljen e Trepçës

Modelet e prezantuara nga zv/kryeministri Behgjet Pacolli për ristrukturimin e gjigantit metalurgjik Trepça, po duket se kanë mbetur të vetmet për t’u marrë parasysh nga Qeveria e Kosovës. Ata që ishin prezentë në diskutimet e para një muaji për këtë çështje, nuk i kanë deponuar me shkrim propozimet e tyre.

Vetë zv/kryeministri Pacolli konfirmon se në adresë të zyrës së tij nuk ka shkuar asnjë ide se si do të duhej të veprohej me Trepçën.

Përfaqësues të biznesit dhe shoqërisë civile nuk kanë dhënë arsye përse nuk i janë përgjigjur ftesës së Pacollit për të dhënë propozime rreth Trepçës. Ata nuk kanë pranuar të deklarohen lidhur me këtë çështje.

Megjithatë, merret vesh se Oda Ekonomike Gjermane është duke përgatitur një studim sa i përket kësaj ndërmarrjeje. Deri më tani, sipas numrit dy të ekzekutivit, ka pasur nga ata që i kanë dhënë mbështetje idesë, por ka pasur edhe kritika që në të shumtën e rasteve kanë qenë të pabazuara(Tribuna).