I ndan vetëm dialogu me Serbinë

Koalicioni paszgjedhor po lëkundet nga qëndrimet e mëhershme se nuk pranon të hyjë në bashkëqeverisje me ndonjë subjekt që i vë kushte. E kushte i ka vënë që nga fillimi Lëvizja Vetëvendosje. Por, dy më të vështirat për t’u përmbushur nga blloku, kanë konsistuar në rishikimin e procesit të privatizimit dhe delegimin e përgjegjësisë te Vetëvendosja për udhëheqje të dialogut Kosovë-Serbi.

Derisa javë më parë kushtet e vëna nga Vetëvendosje shiheshin si të papërballueshme për bllokun paszgjedhor, tash zyrtarët e të dyja palëve konfirmojnë se janë në prag të arritjes së marrëveshjes.

Ahmet Isufi nga radhët e bllokut, ka thënë për Tribunën se janë në pritje të vendimit të Gjykatës Kushtetuese në lidhje me lëndën e dërguar nga Partia Demokratike e Kosovës që ka kontestuar seancën konstituive të kuvendit ku edhe u zgjodh Isa Mustafa kryetar i këtij organi, në mënyrë që më pas të përgatiten për krijimin e institucioneve të reja.

“Normalisht që janë përafruar qëndrimet me Lëvizjen Vetëvendosje. Besojmë që të gjitha çështjet e diskutueshme do të jenë në vullnetin e palëve për afrim”, ka thënë Isufi.

Sipas tij, dy palët kanë arritur në një pajtim për të gjitha çështjet në parim, dhe se çështja e dialogut dhe privatizimit do të diskutohen ende, edhe pse ka pranuar se edhe në këto dy pika ka përfarim të palëve…(Tribuna).