I mjaftoi vetëm një minutë, sulmuesi i talentuar nga Kosova bën debutim ëndrrash në futbollin profesionist: Gol dhe gëzim i papërshkrueshëm

Emir Kuhinja do ta mbajë gjatë në mend 2 shkurtin e vitit 2024, pasi ka bërë debutimin në futbollin profesionist.

Sulmuesi i talentuar nga Kosova vetëm një javë më herët ka bërë hapin e madh në karrierë, derisa iu bashkua Magdeburgut në Bundesliga 2 nga Regionaliga ku luante për SGV Freiburg.

E qysh në ndeshjen e tij të parë në futbollin profesionist, Kuhinja ka realizuar golin e tij të parë në sfidën ndaj Holstein Kiel.

21-vjeçari u inkuadrua në lojë në minutën e 90+4 në vend të Hugenot dhe vetëm një minutë më vonë u shëndrrua në hero të Magdeburgit.

Kuhinja u gjend bukur në zonë dhe me një gjuajtje nga afërsia realizoi për të barazuar shifrat në 1-1 duke sjell një gëzim të madh në stadium.

Te Magdeburgu në këtë ndeshje luajtën si titullar edhe dy futbollistët tjerë shqiptarë, mbrojtësi i Kosovës U21, Andi Hoti dhe sulmuesi nga Shqipëria, Jason Ceka.

Ky ishte goli i parë i sulmuesit qendror në futbollin profesionist dhe një nisje e mbarë për një karrierë që duket se është e destinuar të jetë e madhe. /Telegrafi/