I duam për interes!

Diaspora kosovare, e cila për vite me radhë ka blerë “paqen sociale”, po vazhdon të konsiderohet e huaj nga institucionet vendore. Pa përfaqësim në vendimmarrje dhe pa lehtësira kufitare, bashkatdhetarët po shihen vetëm si remitencë. Opozita dhe analistët politikë kërkojnë nga Qeveria e Kosovës të bëjë më shumë për mërgimtarët, ndërsa heqjen e “plaçkës kufitare” e konsiderojnë imediate.

Bashkatdhetarët që jetojnë nëpër shtetet e ndryshme të botës, e përbëjnë një të tretën e trungut demografik të Kosovës, ndërsa për vite me radhë ata anashkalohen nga institucionet e vendlindjes. Për institucionet, diaspora shihet më shumë si “remitencë” për të stabilizuar paqen sociale, ndërsa për opozitën si “viktimë” e Qeverisë.

Përfaqësuesit e subjekteve opozitare dhe analistët politikë, kërkojnë nga Qeveria e Kosovës që të krijojë më shumë lehtësira për investitorët nga diaspora. Ata gjithashtu kanë potencuar nevojën që mërgata të mos mbetet e përjashtuar nga vendimmarrja politike, ndërsa taksat kufitare që aplikohet në kufij, për opozitën, janë “plaçkë institucionale”. Prandaj, ata konsiderojnë se diaspora duhet të përfaqësohet edhe në Kuvendin e Kosovës, duke ia rezervuar disa ulëse, ashtu siç është e rregulluar edhe në disa vende të rajonit./zeri/