I dëmtohet dhe i plaçkitet vetura, pronari i parkingut nuk merr përgjegjësi

Gjilan – Donlir Xhelili pronar i veturës Golf 4 ka dërguar në redaksinë tonë disa foto ku shihet vetura e dëmtuar dhe e plaçkitur. Sipas Xhelilit e keqja e tërë kësaj pune është se pronari i parkingut të fushës së futbollit nuk jep përgjegjësi për dëmet e veturës.

Donlir Xhelili ka mbetur i habitur kur në parkingun e fushës së futbollit “San Siro” ka gjetur veturën e tij Golf 4 të vjedhur e të dëmtuar.

Xhelili ka dërguar disa foto në adresën tonë ku shihet qartë vetura e thyer dhe e plaçkitur. “E nderuara redaksi dëshirojë të ju informojë për një rast që më ka ndodhur sot në fushën e futbollit “San Siro” ku ma kanë thyer veturën Golf 4 i cili ka qenë i parkuar në parkingun e fushës. Arsyeja e thyerjes ka qenë vjedhja e pajisjeve në veturë, me çka është dëmtuar vetura dhe janë vjedhur disa pajisje të cilat kanë qenë brenda veturës. Kjo nuk është vjedhja e parë që ka ndodhur në parkingun e kësaj fushe. Pronari i kësaj fushe nuk jep përgjegjësi për sigurimin e veturës” ka shkruar Xhelili./rajonipress/