Hyseni prezanton më në detaje projektin e stadiumit dhe të bulevardit të qytetit

Gjilan – Kryetari i Komunës së Gjilanit, Alban Hyseni, në konferencën për media të mërkurën, ka prezantuar më në detaje projektin e stadiumit të qytetit dhe të bulevardit të qytetit.

Ai bëri të ditur se kosto e projektit të stadiumit është rreth 15 milionë euro.

“Stadiumi i qytetit është njëri prej projekteve më të rëndësishme që është zhagitur për gjashtë vite. Ky projekt ka kosto rreth 15 milionë euro dhe 9 mijë e 84 ulëse. Sa i përket procedurës, tashmë është mbajtur seanca dëgjimore në OSHP, lidhur me pretendimet që ka pasur njëri prej operatorëve. Ne e kemi mbrojtur qëndrimin tonë si autoritet kontraktues dhe jemi në pritje të përgjigjes lidhur me dosjen e tenderit se a duhet të ndryshohen kriteret apo jo, në mënyrë që të vazhdojmë me hapjen e ofertave dhe përzgjedhjen e fituesit”, ka thënë kryetari i Gjilanit.

Ai ka shtuar se në rastin ideal muaji mars do të nënkuptonte lidhjen e kontratës dhe fillimin e punimeve për stadiumin e qytetit.

“Por, kjo sigurisht mbetet të shihet nëse ka ndonjë operator që prapë do të bëjë ankesë dhe do ta vonojë procesin”, është shprehur Hyseni.

Sa i përket bulevardit të qytetit, Hyseni theksoi se kostoja totale rreth 20 milionë euro.

“Ajo që dihet është se projekti, përveç hapësirës së sipërme që i shërben qytetarëve dhe aktiviteteve të ndryshme, e ka edhe pjesën e parkingut nëntokësor, që do të jetë një burim shtesë i të hyrave për komunën tonë”, tha ai.

Kreu i Gjilanit ka nënvizuar se parkingu nëntokësor ka një element të veçantë, që në rastin e shfrytëzimit të tij prej rreth 40 për qind të kapacitetit të plotë gjatë tërë vitit, me pagesë për një euro për një orë të shfrytëzimit, gjeneron rreth 2.1 milionë të hyra në vit.

“Kjo nënkupton një të tretën e të hyrave vetanake aktualisht, ku të hyrat do të kalonin mbi 8 milionë euro vetëm nga shfrytëzimi i parkingut nëntokësor”, tha ai, për të shtuar se në kuadër të këtij projekti është i planifikuar edhe një objekt qendror ku do të mund të bëhen bashkë të gjitha drejtoritë, zyrat dhe njësitë e Komunës së Gjilanit, për shërbime më cilësore ndaj qytetarëve./rajonipress/