Hyseni nënshkruan memorandum me Qatar Charity për ndërtimin e QMF-së në lagjen Arbëria dhe tetë shtëpi për familjet në nevojë

Gjilan – Kryetari i Komunës së Gjilanit, Alban Hyseni, ka nënshkruar memorandum bashkëpunimi dhe bashkëfinancimi me drejtorin e organizatës Qatar Charity, Esam Dabab, për ndërtimin e një Qendre të Mjekësisë Familjare (QMF) në lagjen Arbëria dhe për ndërtimin e tetë shtëpive për familjet në nevojë.

Hyseni, pasi e ka falënderuar drejtorin e kësaj organizate për mbështetjen dhe bashkëpunimin, ka bërë të ditur se shuma totale e këtij memorandumi është 500 mijë euro, ku 340 mijë euro janë të destinuara për ndërtimin e QMF-së, ndërkaq 160 mijë euro për ndërtimin e tetë shtëpive.

“Ne shprehim mirënjohje të thellë kundrejt organizatës bamirëse “Qatar Charity” për bashkëfinancimin e këtyre dy projekteve të cilat do ndikojnë në sigurimin dhe përmirësimin e cilësisë së jetës së qytetarëve”, ka deklaruar pas nënshkrimit të kësaj marrëveshje kreu i Komunës, Alban Hyseni./rajonipress/