Hyseni: Jo koalicion me PDK-në

LDK natyrshëm i thotë jo koalicionit me PDK’në. Nuk është referencë e mirë shkuarja në zgjedhje më një Kryetar që ka humbur garën komunale, por kjo nuk e minon suksesin e tij. S’ka më qesharake se kur dëgjon Enver Hoxhajn duke deklaruar se Serbia e ka njohur Kosovën. Ai e ka shndërruar Ministrinë e Jashtme në një OJQ. Me keqardhje ju them se nuk e di sa është numri i njohjeve që i kanë ardhur Kosovës. Ish-Ministri i Jashtëm Skender Hyseni flet për Express.
Express: Sa është e përgatitur LDK’ja për zgjedhjet e ardhshme nacionale?

S. Hyseni: LDK është shumë e përgatitur për këto zgjedhje. Po bëhen gati dy vite që LDK është në proces të njëlloj ristrukturimi. Është në proces të një aktivizimi politik brendapartiak, i cili shkon në të gjitha nivelet, në të gjitha rrafshet e organizimit partiak dhe një paralajmërim i rezultateve fillestare të kësaj pune ishin zgjedhjet lokale, ku LDK shënoi rezultat të mira, mendoj unë. Të lakmueshme. Aktualisht, LDK është duke punuar në të gjitha strukturat dhe në të gjitha nivelet që në zgjedhjet kurdo që ndodhin ato, të futet akoma më e përgatitur se në zgjedhjet lokale. Zgjedhjet mund të mbahen një muaj para ose prapa dhe kjo ka fare pak rëndësi se a mbahen në maj apo në qershor, apo në prill apo edhe në shtator me kusht që shtatori të jetë afati i fundit. Sepse rëndësi thelbësore ka rregullariteti i këtyre zgjedhjeve. Është jetike për Kosovën që pas një procesi zgjedhor komunal, shumë të suksesshëm, të rregullt,është jetike që ta përsëris të njëjtën gjë, edhe në nivel qendror. Sepse Kosovës më shumë se kurrë i duhet një mesazh i qartë në botë se Kosova është pjekur në rrafshin e demokracisë dhe të politikës. Kosova ka nevojë më shumë se kurrë, tash në kohën kur imazhi i Kosovës nuk është edhe aq i lakmueshëm.

Express: Çka janë marrë vesh Isa Mustafa dhe Hashim Thaçi sa i përket mbajtjes së zgjedhjeve nacionale?

S. Hyseni: z. Mustafa dhe z. Thaçi nuk janë marrë vesh për asgjë.

Express: Që i bien?
S. Hyseni: Ka një pajtim në parim, do të thosha unë, që zgjedhjet e ardhshme të mbahen në qershor. Sepse LDK insiston dhe këmbëpulë dhe është shumë e interesuar që këto zgjedhje të zhvillohen në qershor për shumë arsye. Prandaj, një marrëveshje si e tillë nuk ekziston, siç është spekuluar shumë në opinion. Ka përafrim qëndrimesh, jo vetëm me PDK’në, por edhe me AAK’në, edhe me partitë tjera, me të cilat LDK ka pasur takime këto ditë. Gjithnjë në përpjekje që të ndërtohet një konsensus nacional rreth zgjedhjeve. Të merremi vesh secila parti garon në zgjedhje me programe të veta. Mirëpo, procesi zgjedhor si i tillë është interes nacional. Për aq sa është e mundshme të arrihet një konsensus nacional është tej mase i mirëseardhur.

Express: Është përmendur se Isa Mustafa e Hashim Thaçi janë marrë vesh edhe për ndarjen e pozitave pas zgjedhjeve të ardhshme. Sa është i mundshëm të përsëritet një koalicion LDK-PDK?
S. Hyseni: Unë nuk jam njeri që komenton spekulimet e rragëve, të kafeneve.

Express: Sa është i mundshëm një koalicion i ardhshëm me PDK’në?
S. Hyseni: Këto janë spekulime të pastra. Spekulime të qarkullojnë dhe lansohen për një qëllim ose tjetër. Unë kam frikë se ndonjëherë lansohen pikërisht për ta dëmtuar LDK’në në këtë proces zgjedhor. LDK nuk e ka ndërmend të hyjë në koalicion me asnjë subjekt politik. Asnjë lloj koalicioni parazgjedhor. LDK beson fuqishëm se do t’i fitoj këto zgjedhje. Dhe, vetëm atëherë LDK do të ulet dhe do të analizoj cila është mënyra më e mirë për të vazhduar tutje.

Express: Cila është ajo mënyrë?

S. Hyseni: Mënyra më e mirë për të vazhduar tutje është një Qeveri, e cila përbëhet prej njerëzve që kanë pikëpamje shumë të përafërta të programeve zhvillimore për të quar Kosovën përpara.

Express: Është opsion PDK’ja?

S. Hyseni: Unë nuk jam i sigurt dhe për herë të parë po e dëgjoj se është opsion PDK’ja. Sepse ka pasur periudha kohore kur koalicione të caktuara janë imponuar për interesa pak më të mëdha shtetërore. Tashti, Kosova ende është në një periudhë të ndjeshme të shtetndërtimit edhe në rrafshin nacional, edhe në rrafshin ndërkombëtar. Dhe, në çështje të caktuara, Kosova ka nevojë jetike për konsensus nacional siç është dialogu me Serbinë ose marrëdhëniet me fqinjët. Unë insistoj që sa i përket që ka të bëjë me raportet Kosovë-Serbi, me dialogun me Serbinë, me marrëdhëniet e ardhshme me këtë shtet fqinjë, Kosova duhet të kërkoj dhe të insistoj në konsensus nacional.

Express: Cili është vlerësimi juaj, me kënd duhet të bëjë koalicion LDK’ja pas zgjedhjeve?
S. Hyseni: LDK është parti politike me kod shumë të qartë të sjelljes, të definuar në detaje në Kushtetutë i them unë – Statut i thonë të tjerët – dhe statuti jep orientime të qarta se si mund të bëhet një koalicion dhe kur mund të bëhet. LDK nuk paragjykon rezultate të zgjedhjeve sepse është fuqimisht e përkushtuar për parime demokratike. Ditën kur rezultatet e zgjedhjeve të bëhen të ditura, të certifikohen, dhe unë sërish po e them se jam i bindur se LDK do t’i fitoj zgjedhjet, LDK do të ulet dhe do të vendos nëse do të ketë nevojë për ndonjë koalicion pak më të madh. Me kë do ta bëjmë atë koalicion. Në LDK, të gjitha analizat na thonë që përqindja e fituar do të jetë bindëse dhe kjo ta bëjë LDK’në komode në përzgjedhjen e partnerëve të qeverisjes. Ai program duhet të jetë, nëse jo njëqind për qind i ngjashëm me programin e LDK’së, duhet të jetë shumë i ngjashëm me programin qeverisës që LDK gati e ka finalizuar që Kosovës i premton zhvillim, i premton investime, i premton vende pune, i premton rritje buxheti, i premton shpërndarje të kujdesshme.

Express: Disa prej udhëheqësve të LDK’së kanë thënë se PDK’ja s’vjen në konsideratë për koalicion?

S. Hyseni: Ju serish po kërkoni nga unë të komentoj deklarata të tjerëve. Unë jap mendimin tim.

Express: Si e shihni një koalicion PDK-LDK?

S. Hyseni: Mendimi im është që LDK të mos futet në asnjë lloj koalicioni parazgjedhor. Edhe nuk duhet të jap asnjë lloj indikacioni për koalicionet paszgjedhore se mund të japësh indikacione për koalicione pas zgjedhore pa i ditur rezultatet. Një koalicion me PDK’në do të duhej natyrshëm të përjashtohej për shkak të shëndetit të demokracisë në vend. Është krejt çështje tjetër, po e them, kur në situata të caktuara nacionale, në çështje të mëdha nacionale, siç ishin bisedat për statusin, shpallja e pavarësisë së Kosovës, ndërtimi i institucioneve të shtetit të pavarur të Kosovës menjëherë pas shpalljes së pavarësisë kanë qenë situata që kanë imponuar koalicione të ndryshme. Edhe koalicione të panatyrshme. Mirëpo, unë jam i bindur se edhe nga perspektiva e sotshme, për nga perspektiva e Kosovës, ajo ka qenë mënyra e vetme për të shkuar përpara. Ndërkaq, tashti Kosova dhe partitë politike veç e veç janë në një situatë krejt tjetër.

“S’e kemi humbur garën për Prishtinën”

Express: Në fillim e përmendët se keni arritur një rezultat të kënaqshëm në zgjedhjet lokale. Cili është vlerësimi juaj për humbjen e LDK’së në Prishtinë?

S. Hyseni: Vlerësimi im është i thjeshtë dhe shumë i saktë. LDK e ka fituar Prishtinën, e kemi humbur garën për Kryetar. Duhet të shihet qartë sepse gjithandej dëgjohet qysh LDK e ka humbur Prishtinën. Nuk e ka humbur LDK Prishtinën sepse në Asamblenë komunale LDK është bindshëm partia e parë me 17 ulëse.

Express: Kështu po thonë edhe partitë tjera që e kanë humbur garën nëpër komuna për Kryetar, por kanë shumicën nëpër Asamble komunale….

S. Hyseni: Gjithandej ku ka fituar LDK edhe për Kryetar Komune e ka shumicën. Është i vetmi rast në Prishtinë ku partia ka fituar por kandidati e ka humbur garën. Unë e kam një shpjegim për Prishtinën. Shpjegimi është se në balotazh të gjitha partitë tjera janë kthyer kundër nesh pa përjashtim. Ky është një version dhe çdo politikan që nuk e llogarit këtë e ka humbur rrugën në politikë.

Express: Isa Mustafa nuk e ka llogaritur këtë?
S. Hyseni: E ka llogaritur edhe shumë. Jam i sigurt se e ka llogaritur shumë dhe ka punuar shumë. z. Mustafa ka punuar shumë dhe një pjesë të mirë të energjisë, për të mos thënë shumicën e energjisë e ka harxhuar nëpër komuna të tjera.

Express: E ka anashkaluar Prishtinën?

S. Hyseni: Unë nuk them se e ka anashkaluar Prishtinën, por gjithsesi i ka dhënë peshë Partisë më shumë se vetvetes dhe garës së tij personale për Prishtinën. Pastaj mos harroni, LDK e ka qeverisur Prishtinën për 14 vite rresht gjatë gjithë kohës së pasluftës. Çdo analizë me kokë e jo me zemër të thotë se një votues mesatar i Kryeqytetit, pas një periudhe aq të gjatë, mund të kërkoj ndryshime. Mund të ndjej nevojë për ndryshim. Prandaj, rrjedhimisht, edhe në balotazh partitë tjera e kanë parë një rast të mirë që LDK ta dobësojnë. Jo, z. Mustafa domosdoshmërish, por LDK’në ta dobësojnë duke votuar kundër kandidatit të LDK’së e duke e pasur parasysh se jemi në prag të zgjedhjeve nacionale. Unë nuk flas kundër një komploti kundër LDK’së, por kjo votë kundër LDK’së ka qenë krejt spontane dhe në mënyrë të pavetëdijshme, por vetëm të mundet LDK në Prishtinë sepse kanë interes të gjitha partitë, e në veçanti partitë konkurrente, siç është LDK. Unë jam i bindur se PDK masivisht ka votuar kundër LDK’së, kundër kandidatit të LDK’së. Masivisht ka votuar kundër kandidaturës së z. Mustafa.

Express: Sa është problem për LDK’në të shkojë në zgjedhje nacionale me një kandidat që e ka humbur garën për Kryetar komune?
S. Hyseni: Unë nuk mund të them se kjo është referencë e mirë, mirëpo, jam i bindur se absolutisht nuk e minon kredibilitetin dhe potencën e Isa Mustafës, si kandidat për Kryeministër të Kosovës, fakti se e ka humbur garën për Kryeqytet. Ka plot raste në botë kur liderë të ndryshëm humbin garën të caktuara, mirëpo, në një garë tjetër dalin jashtëzakonisht të suksesshëm. Pastaj, LDK është përcaktuar për Isa Mustafën, me plotë vetëdije, pas një debati absolutisht shterues, ku kanë folur mbi 30 anëtarë të Këshillit të Përgjithshëm të LDK’së….LDK është shembull i debateve për partitë politike pa krijuar idhuj të pakontestueshëm.

Express: Në atë debat ku Kryetari i LDK’së u nominua për Kryeministër doli kundër Fatmir Sejdiu, i cili ia ka kërkuar edhe dorëheqjen z. Mustafa nga pozita e Kryetarit të LDK’së

S. Hyseni: Meqenëse Këshilli i Përgjithshëm ka punuar me dyer të mbyllura e ju paskeni informacion më shumë se unë…

Express: Fatmir Sejdiu publikisht ia kërkuar dorëheqjen Isa Mustafës…

S. Hyseni: Publikisht nuk e kam dëgjuar. E di që ka pasur votim. Është votuar dhe dihet rezultati. Nuk e kam ndërmend të heq dorë nga parimi im që asnjëherë s’komentoj deklarime që bëjnë bashkë partiakët e mi. Secili ka të drejtë të thotë mendimin e vet të hapur pa asnjë rrezik nga reperkusioni. Prandaj, debati në LDK është arma më e fuqishme.

Express: A po e kërkon me të drejtë Fatmir Sejdiu dorëheqjen e Isa Mustafës?

S. Hyseni: Ju sërish po kërkoni të komentoj diçka. Unë nuk e kam ndërmend të komentoj.

Enver Hoxhaj s’e di numrin e saktë të njohjeve

Express: Po dalim te politika e jashtme. A e dini sa njohje i kanë ardhur Kosovës pasi në uebfaqen e Ministrisë së Punëve të Jashtme figurojnë vetëm 96?
S. Hyseni: Nuk e di sa njohje i ka Kosova.

Express: Se s’e dini, kur jeni edhe anëtar i Komisionit për Politikë të Jashtme i Kuvendit të Kosovës?
S. Hyseni: Sepse as Ministri i Jashtëm z. Hoxhaj nuk ishte në gjendje që në Komisionin për Politikë të Jashtme të thoshte numrin e saktë të njohjeve.

Express: Po përmenden se janë 106 njohje?
S. Hyseni: Është çështje tjetër çka përmendet, është çështje tjetër gjendja reale. Me shumë keqardhje e them se nuk e di cili është numri i saktë i njohjeve. Ky është treguese më i mirë se ku është katandisur politika e jashtme e Kosovës. E ka katandisur Qeveria e Kosovës, e ka katandisur Ministri Hoxhaj. Nëse një ish-Ministër i Jashtëm, nëse një anëtar i Komisionit për Politikë të Jashtme nuk e di sa njohje i ka vendi i tij, nëse Komisioni për Politikë të Jashtme nuk e di numrin e saktë të njohjeve, ky është tregues alarmant i joseriozitetit, i mospunës në atë Ministri dhe në Politikën e Jashtme. Kjo është për keqardhje. Ju siguroj se Skender Hyseni kur flet për Politikën e Jashtme, absolutisht, nuk flet me emocion, por flet me kokë të kthjellët dhe me brengosje të thellë.

Express: Çka është duke ndodhur në Politikën e Jashtme?

S. Hyseni: Fatkeqësisht, Politika e Jashtme e Kosovës e ka reduktuar aktivitetin e vetë totalisht në punë, të cilat shumë më mirë do t’i bënte një OJQ.

Express: Që i bien?

S. Hyseni: Aty ka organizim vizitash, sjellin do gazetarë nga Federata Ruse në Prishtinë për të na treguar se Rusia e njehka Kosovën. Thua se ne nuk e dimë se Federata Ruse nuk e njeh Kosovën, por kemi nevojë të vijë dikush nga Moska në Prishtinë për të na treguar se ne s’ju njohim. Një tip seminaresh organizohen dhe kushedi çka synohet me ato seminare.

Express: Megjithëkëtë, në këtë Qeveri ka më së shumti zyrtarë që merren me Politikë të Jashtme?

S. Hyseni: Nuk e kam shumë për qejf të citoj shumë dhe nuk i kam në qejf fusnotat. Por, kjo ma kujton Winston Churchillin, i cili thoshte se sa herë që dëshiron të mos kryesh asnjë punë bëjë komisione të mëdha dhe angazhojë shumë njerëz. Pikërisht, këtë është duke e bërë kjo Qeveri. Ka aq shumë njerëz në Politikën e Jashtme, por rezultatet janë për keqardhje. Njohjet janë vetëm një dimension shumë i vogël. Pas dhjetë vjetësh nuk do të jetë fare temë puna e njohjeve. Pas dhjetë vjetësh, Kosova do të jetë anëtare e OKB’së. Dhe, më njohjet nuk do të jenë fare pjesë e Politikës së Jashtme. Politika e Jashtme është shumë më shumë. Dhe, Politikë të Jashtme nuk ka.

Express: Sipas jush, pse s’po ndodh liberalizimi i vizave?

S. Hyseni: Për shkak të ngathtësisë për të plotësuar kriteret. Këtu nuk duhet të amnistojmë askënd pos vetës tonë. Liberalizimi i vizave po zvarritet si rezultat i mesazheve tepër të dëmshme që po rezultojnë me afera korruptive të llojllojshme. Këtu nuk amnistohet askush dhe përfshihet e gjithë shoqëria. Mirëpo, janë institucionet përgjegjëse që nuk kanë dhënë asnjë rezultat të prekshëm për luftimin e korrupsionit dhe krimit të organizuar.

Express: A është dashur dikush të shkoj në shtëpi prej Ministrave për skandalet që kanë ndodhur në Qeveri?
S. Hyseni: Është dashur të shkojnë të gjithë ata për të cilët ka dëshmi dhe fakte se janë të përfshirë në afera korruptive.

Express: Cilët janë ata?
S. Hyseni: Nuk e di dhe nuk paragjykoj. Nuk e kam në plan të spekuloj në bazë të fjalëve që thuhen rrugëve. Mirëpo, nëse në Ministrinë e Brendshme shpërthen një skandal rreth pasaportave. Dhe, ka njerëz të arrestuar për këtë skandal. Është një proces në vijim e sipër. Nuk do të duhej pritur për më shumë prova që qoftë edhe si akt moral, qoftë edhe si përpjekje për të dërguar mesazhin pozitiv në botë që Kosova di të veproj në pajtim me ligjin, të bëheshin ndryshime të caktuara. Sërish, nuk do ta marrë rolin e kadisë sepse nuk jam. Por, me sjelljen e vetë Kosova po dërgon mesazhe çfarë nuk do të duhej.

Express: Por, Kryeministri Thaçi pati thënë në vitin 2010 se për 15 muaj do të ketë liberalizim të vizave?
S. Hyseni: Kryeministri dhe ky Kabinet kanë bërë aq shumë deklarata mendjelehta saqë nuk ia vlen as të merremi me to. Zyrtarët e kësaj Qeverie kanë thënë se edhe fusnota është si një fjollë bore dhe në pranverë shkrihet. E ne tash po luajmë edhe futboll me fusnotë. Gjithë respektin ekipit tonë dhe lojës së shkëlqyeshme dhe një ekip i jashtëzakonshëm dhe i përgëzoj sportistët me këtë rast. Këto ditë dëgjova që Ministri Hoxhaj sërish tha se Serbia e ka njohur Kosovën defakto. Dhe, nuk ka deklaratë më qesharake se Serbia e ka njohur Kosovën.

Express: Pse Ministri i Jashtëm e thotë këtë deklaratë?

S. Hyseni: Ministri i Jashtëm e thotë këtë deklaratë sepse Politika e Jashtme rezultatet i ka zero dhe ka nevojë të mbulohet me diçka kaq skandaloze, duke thënë se Serbia tashmë e ka njohur Kosovën.

Express: Ndoshta ka folur figurativisht?
S. Hyseni: Edhe me figurë nuk thuhet ashtu sepse Serbia është duke bërë luftë të egër që ta gjymtoi shtetësinë e Kosovës ndërkombëtarisht. E ka mbërri me fusnotë dhe e ka lënduar bukur keq. Këtë fusnotë po e përdor që ta bëjë Kosovën shtet gjysmak në të gjitha rrafshet. Madje edhe në futboll.

Express: Si mund të hiqet tash kjo fusnotë?
S. Hysen: Kjo fusnotë është aty dhe nuk mund të pretendojmë se nuk është. Është marrëveshje dhe zotim ndërkombëtar që e ka bërë Kosova, fatkeqësisht. Kjo fusnotë do të hiqet vetëm atëherë kur Republika e Kosovës të fitojë së pari përkrahjen e partnerëve ndërkombëtarë – SHBA’së dhe BE’së, sidomos Britanisë së Madhe, Gjermanisë, Francës dhe Italisë – duhet ta fitojmë përkrahjen këtyre pesë vendeve që të filloi një fushatë e gjatë dhe e mundimshme edhe të heqjes së fusnotës, edhe të zëvendësimit të Rezolutës 1244, edhe të heqjes së neutralitetit ndaj statusit të Kosovës në Bruksel. Sepse është edhe neutraliteti ndaj statusit të cilin e ka imponuar pesëshja që nuk e ka njohur Kosovën që shpeshherë po del si postbllok dhe pengesë bukur e madhe për Kosovën në rrugën e saj drejt integrimeve.

Express: Çka ka bërë Kosova që edhe pesë vendet e BE’së ta njohin Kosovën?
S. Hyseni: Asgjë. E ka bërë të kundërtën. Politika e Jashtme e Kosovës ka pranuar që referenca 1244 të futet në fusnotë. Unë nuk jam naiv të mos e kuptoj se Rezoluta 1244 se ekziston deshëm apo nuk deshëm ne. Mirëpo, e pakta nuk do të duhej të rikthehej në pëlqimin tonë. Është pëlqimi ynë që ka dërguar mesazhe jo të mira. Por, kjo është histori… Historinë nuk mund ta ndryshojmë, por mund ta ndryshojmë të ardhmen. Mund ta kanalizojmë të ardhmen.