Hyseni i PSD-së: Gjendja e rëndë ekonomiko-sociale po i detyron të migrojnë, për 10 vite s’do kemi të rinj

Anëtari i Partisë Socialdemokrate (PSD), Zgjim Hyseni ka thënë se përvjetorin e Pavarësisë, Kosovën e gjen në gjendje të rëndë ekonomike e sociale, raporton Ekonomia Online.

Hyseni u shpreh se Qeveria Kurti ka kontribuuar më shumë në migrimin e të rinjve, teksa thotë se për 10 vitet e ardhshme, Kosova do të mbesë pa të rinj.

Në një prononcim për Ekonomia Online, Hyseni thotë se institucionet nuk kanë ndërmarrë masa për parandalimin e ikjes së të rinjve jashtë shtetit.“Kosovën ky përvjetor i pavarësisë e gjënë në gjendje të rënd, më së shumit sa i përket të drejtave ekonomike dhe sociale. As një veprim i qeverisë nuk ka qenë domethënës për ta ndalur këtë trend që është jashtëzakonisht shqetësuese edhe me bërë maksimumin ne nuk e dimë a mundet të ndalet ky trend nga qeveria. Sepse qartazi nuk është gjithçka në dorën e qeverisë sa i përket këtij trendi, mirëpo Qeveria nuk ka bërë pothuaj asgjë për të ndalur këtë trend (ikjen e të rinjve). Kosova me këtë dinamik për 10 vitet e ardhshme do të zbrazet edhe do të jetë një vend pa të rijnë, ose vetëm më të rinjtë që janë të afërt me bizneset e mëdha dhe pushtetin”, thotë ai.

Sipas Hysenit, institucionet kosovare duhet të gjejnë mënyra që t’a ndalin këtë migrim. Thotë se është e padrejtë që Gjermania t’i josh të rinjtë për t’u punësuar, ndërkohë“Bindja ime është që karshi këtij procesi të emigracionit, kritikë duhet t’i drejtohet edhe karshi shteteve që janë duke i marruar ata njerëz, për shkak se ky është zhvillim i pabarabartë. Ne me buxhetin e dobët të Kosovës po prodhojmë mjekë dhe infermierë për Gjermaninë, dhe Gjermania është duke i marr falë ata njerëz. Ndërkohë vinë këtu me program për të blerë shporta të mbeturinave përmes organizatave jo qeveritare”, thotë ai.

“Kjo është e padrejtë kjo duhet që të adresohet, ky është zhvillim i pa barabartë, nuk ka emër tjetër ky nocion i ikjes së trurit. Ky është një prej problemeve të përbashkëta që secili vend i Ballkanit e ka me tregun e përbashkët Evropian”, u shpreh Hyseni.

Shpërndaje.
© RAJONIPRESS