Hydajet Hyseni: Nuk u votua Tribunali, por bashkësia ndërkombëtare

Deputeti i PDK’së Hydajet Hyseni i cili votoi sot kundër themelimit të Gjykatës Speciale për krimet e supozuara të luftës, thotë se duhet të pyeten ata deputetë që votuan pro se për çka votuan, sepse nuk dihet për çka kanë votuar.

Ai tha se objektivisht nuk është votuar themelimi i një Tribunali. Hyseni tha se është votuar “bashkësia ndërkombëtare”.

“Do të ishte interesante po të pyeten deputetët për çka votuan. Ne kishim në rend dite ratifikimin e një marrëveshje ndërkombëtare, që nuk ishte marrëveshje, ishte një letërkëmbim mes Presidentes dhe baroneshës Ashton. Shumëkush do të thoshte nuk kam votuar për Tribunalin sepse objektivisht nuk është votuar për Tribunalin. Ata kanë votuar për bashkësinë ndërkombëtare, si diçka e gjithëfuqishme, që qëndron mbi ne, që përcakton fatin tonë dhe kush është ai që do ta kundërshtojë bashkësinë ndërkombëtare”, tha Hyseni në emisionin “Zona B” të KlanKosovës.