Humb jetën një person nga coronavirusi në Kosovë, konfirmohen afro tre mijë raste të reja

Në 24 orët e fundit në Kosovë nga coronavirusi ka humbur jetën një person, ndërsa janë konfirmuar 2.943 raste të reja.

Ministria e Shëndetësisë, sipas të dhënave nga Instituti Kombëtar i Shëndetësisë Publike të Kosovës, informon se nga 11.563 testime, 2.943 qytetarë kanë rezultuar pozitiv me virusin COVID-19.

“Në 24 orët e fundit janë dhënë 4.467 doza të vaksinës kundër COVID-19. Prej fillimit të vaksinimit në të gjitha qytetet e Kosovës janë dhënë 1.737.417 doza të vaksinës. Deri më sot 799.939 qytetarë janë vaksinuar me dozën e dytë. Deri më sot janë dhënë 44.143 doza përforcuese dhe 4.813 doza të treta të vaksinës kundër COVID-19. Gjatë 24 orëve të fundit, është shënuar 1 rast i vdekjes”, njofton MSH.

Gjithashtu, MSH bën të ditur se sot janë shëruar 317 qytetarë, derisa numri i përgjithshëm i të shëruarve është 159.890.

Në total numri i rasteve aktive është 12.396.

Ndryshe, Qeveria e Kosovës pritet sot t’i miratojë masat e reja antiCOVID-19, pas rritjes së numrit të rasteve.

Me masat e reja kufizimi i qarkullimit të qytetarëve do të jetë nga ora 22:00 deri në ora 05:00, ndërkaq shërbimet e gastronomisë lejohet të zhvillojnë aktivitetin e tyre nga ora 05:00 deri në orën 21:00. /Telegrafi/

Shpërndaje.
© RAJONIPRESS