Humanisti Ibush Muja, ofroi shtëpinë për nevojat e Fakultetit të Mjekësisë në kohën e okupimit

Gjilan – Ibush Muja është emër i njohur për gjeneratat e hershme që kanë ndjekur mësimet nëpër shtëpitë private, koha e okupimit kur Serbia ndalonte dhe pengonte gjithçka që ishte shqiptare. Ibush Muja nuk është kursyer e as frikësuar në këtë kohë, përkundrazi ai ka ofruar në dispozicion të dekanatit të Fakultetit të Mjekësisë shtëpinë e tij.

Kontributi i Ibush Mujës është i pamohueshëm sepse ai me zemër të madhe e me dëshirën që ta ndihmojë arsimin shqip në Kosovë, sakrifikoi edhe familjen për ta lëshuar shtëpinë e tij për nevojat e Fakultetit të Mjekësisë.

“E kam dashur arsimin dhe i dua kuadrot e reja, njerëzit e mirë dhe doktorët e rinj. Do ta përkrahi dhe ndihmojë në të gjitha format shkollën shqipe”, kështu ka deklaruar Ibush Muja për gazetat e atëhershme.

Ibush Muja e dinte mirë se çfarë mund ta priste sepse Serbia në çdo hap ndiqte njerëzit që e ndihmonin mbijetesën e shkollës shqipe.

Por ai ishte i vendosur në rrugën e tij.”S`ka asnjë regjim, asnjë okupator që mund ta ndalojë shkollimin e fëmijëve tanë, me të gjitha forcat e mija do të jem në shërbim të gjeneratave të reja” thoshte me shumë dashamirësi Ibush Muja.

Në librin “Arsimi Shqip në Kosovë 1990 – 1999”, janë dhënë detaje më specifike për rolin dhe ndihmën e madhe që ka ofruar Ibush Muja për arsimin shqip.

Ibush Bajram Muja rruga “Novi Pazari” për nevoja të fakultetit përkatësisht dekanatit prej vitit akademik 1991/92 deri në vitin akademik 1997/98, i liroi pesë dhoma pa pagesë.

Ibushi lindi më 25 maj 1949 në fshatin Hogoshtë të Kamenicës, në vendlindje e kreu shkollën fillore dhe të mesme. Pas Gjimnazit kreu SHLP, drejtimin e arsimit teknik dhe fizikë. Më vonë kreu edhe akademinë e oficerëve rezervë të armatës jugosllave në Karllovac, për të vazhduar shkollën e lartë politike në Beograd dhe krejt në fund kreu edhe Fakultetin Juridik në Prishtinë.

Punoi si arsimtar në shkollën fillore të Hogoshtit, pastaj në shkollën e mesme ekonomike të Prishtinës. Në vitin 1979 punësohet në Këshillin Ekzekutiv të Kosovës, në cilësinë e inspektorit të Mbrojtjes së Përgjithshme Popullore. Në vitin 1990 pushohet nga puna .

Në vitet 90-ta Ibushi i bashkohet lëvizjes së Kosovës për themelimin e shkollimit paralel të asaj kohe, duke e shndërruar shtëpinë e tij në shkollë fakultet. Më 1 shkurt 1992 në shtëpinë e tij filloi punën Fakulteti i Mjekësisë.

Ky tempull i dijes shërbeu për mijëra student dhe profesorë nga të gjitha viset shqiptare, si nga Kosova, ashtu edhe nga Maqedonia, Mali i Zi, E Lugina. Në këtë shtëpi është punuar deri më 8 dhjetor, kur Fakulteti i Mjekësisë transferohet në ndërtesën e Fakultetit Teknik. Në shtëpinë e Ibushit gjatë këtyre viteve diplomuan 823 mjekë, 10 magjistra shkence dhe 1 doktor shkence./rajonipress/