Hoxhaj i kënaqur, por edhe i zhgënjyer nga votimi për vizat

Pas votimit në Komitetin LIBE të Parlamentit Evropian, të raportit për Kosovën që ndërlidhet me liberalizim të vizave, ka reaguar ministri i Punëve të Jashtme të Kosovës, Enver Hoxhaj.

Ai nëpërmjet dy postimeve në llogarinë e tij në twitter ka shprehur kënaqësinë, por edhe zhgënjimin njëkohësisht.

“I kënaqur me votimin në favor të raportit për liberalizim të vizave nga komiteti LIBE i Parlamentit Evropian”, ka shkruar Hoxhaj.

“Falënderim për Tanja Fajon dhe anëtarët e tjerë për mbështetje”.

Ndërkohë me një status tjetër në këtë rrjet social, Hoxhaj shpreh edhe zhgënjimin e tij.

“Gjithashtu i zhgënjyer me mungesën e mbështetjes nga LIBE për dhënien e mandatit për fillim të negociatave”, deklaroi Hoxhaj.

“Shumë mbetet që të adresohen javët që vijnë”.

Komentet e ministrit Hoxhaj vijnë pasi Komiteti LIBE i Parlamentit Evropian votoi raportin për Kosovën të raportueses Tanja Fajon, por kushtëzoi që liberalizimi I vizave për Kosovën të mos shkojë në Parlamentin Evropian, para se Prishtina zyrtare të përmbushë të gjitha kushtet.

E një prej këtyre kushteve është ratifikimi i demarkacionit me Malin e Zi./Gazeta Blic/