Hoxhaj i ashpër me BE-në: Nuk u shpërblye Kosova

Ministri i Jashtëm i Kosovës, Enver Hoxhaj ka kritikuar qasjen e BE-së në raportet me Kosovën dhe Serbinë duke thënë se Brukseli e ka shpërblyer vetëm Serbinë, por jo edhe Kosovën.

“I mirëpres konkluzionet e Këshillit të BE-së sot por Kosova nuk është shpërblyer për angazhimin konstruktiv në dialog dhe reformat e ndërmarra në nivele të ndryshme të qeverisjes. Perspektiva për liberalizim të vizave dhe trajtim të barabartë të Kosovës sikurse të vendeve tjera të Ballkanit Perëndimor duket të jetë nënvlerësuar gjatë këtij viti” ka shkruar Ministri Hoxhaj në profilin e tij në Twitter.

Më tej Kryediplomati kosovar ka thënë normalizimi i marrëdhënieve është larg nga përfundimi dhe marrëveshjet mbesin ende të paimplementuara.