Hoxhaj, Apostolovës: E kemi marrë shumë seriozisht Raportin e progresit
RajoniPress
18:59, 18 Prill, 2018
Zëvendëskryeministri i Kosovës, Enver Hoxhaj, ka takuar sot shefen e zyrës së Bashkimit Evropian në Kosovë, Nataliya Apostolova, me ç’rast është bërë pranim-dorëzimi zyrtar i raportit të Komisionit Evropian për Kosovën.
Zëvendëskryeministri pas takimit tha se raporti përmban të gjetura pozitive për punët që janë kryer, si dhe përbën pasqyrë të qartë për fushat në të cilat duhet të fokusohemi më tepër, në mënyrë që të shënojmë progres, bën të ditur një njoftim nga Qeveria.
Hoxhaj deklaroi se Qeveria e Kosovës do të hartojë plan veprimi për t’i adresuar fushat në të cilat mbetet ende punë për të bërë, të cilat janë pasqyruar edhe në këtë raport.
“Ne si Qeveri e Kosovës e marrim këtë raport shumë seriozisht. Do të bëjmë përpjekje maksimale që ta hartojmë një plan të veprimit në Qeverinë e Kosovës, në mënyrë që t’i zbatojmë të gjitha kërkesat dhe të gjeturat që ka nxjerrë ky raport”.
Hoxhaj foli për pritjet e qytetarëve të Kosovës nga BE-ja, ku theks të veçantë i vuri liberalizimit të vizave.
“Pritja kryesore që e kanë qytetarët e Kosovës është procesi i liberalizimit të vizave, dhe gjuha që është përdorur në lidhje me këtë proces, në raport, është gjuhë premtuese. Ka një vlerësim pozitiv, ndërsa neve na mbetet që të bëjmë punë brenda vendit dhe na mbetet që të lobojmë tek shtetet anëtare dhe institucionet në Bruksel, me qëllim që këtë pritje të qytetarëve ta shndërrojmë në realitet gjatë vitit 2018”, deklaroi Hoxhaj.
Në anën tjetër, shefja e zyrës së BE-së, Nataliya Apostolova tha se raporti rikonfirmon përkushtimin e Komisionit Evropian për perspektivën evropiane të Ballkanit Perëndimor, e në veçanti për Kosovën, bën të ditur njoftimi nga Qeveria.
“Raporti reflekton të arriturat e Kosovës në këtë periudhë. Ka shumë punë që mbetet për të bërë, por nuk duhen lënë anash edhe përparimet në fusha të ndryshme. U pajtuam me zëvendëskryeministrin Hoxhaj, që bashkërisht të dalim me një plan veprimi për t’i adresuar prioritetet dhe mënyrën e implementimit të tyre”, ka deklaruar Apostolova pas takimit.
