Hoxha: Europa nuk është e plotë pa Ballkanin

Ministrja e Drejtësisë Dhurata Hoxha, ka thënë se Bashkimi Europian nuk është i plotë pa integrimit e plotë të Ballkanit në këtë strukturë.

Këtë deklaratë Ministrja e Drejtësisë e ka dhënë në Samitin e Komisioneve për Punë të Jashtme të Parlamenteve të Shteteve të Europës, nën organizimin e Komisionit për Punë të Jashtme të Kuvendit të Kosovës.

“Europa nuk është e plotë pa Ballkanin. Ministria e Drejtësisë, ka për qëllim fuqizimin e sektorit të drejtësisë dhe sundimit të ligjit dhe kjo është njëra prej obligimeve kryesore që rrjedhë nga Marrëveshja e Stabilizim Asociimit”.

Hoxha po ashtu është shprehur se ky rajon tash e ka të domosdoshme që të ketë raporte të mira fqinjësore.

“Ballkani është një vend me një histori të begatë, por për fat të keq me shumë tragjedi. Sot më shumë se kurrë ka nevojë për fqinjësi të mirë. Javët e kaluara na treguan se sa e brishtë mund të jetë paqja nëse të gjitha vendet nuk angazhohen për të”.