Hovenier i quan të papranueshme sulmet ndaj EULEX-it e Policisë së Kosovës në veri

Misioni i EULEX-it ka bërë të ditur se mbrëmë një patrullë e vëzhguesve të EULEX-it është sulmuar me një shok-bombë në afërsi të Rudarit në veri të Kosovës.

E ndaj këtij sulmi gjatë ditës së diele ka reaguar ambasadori i Shteteve të Bashkuara të Amerikës në Kosovë, Jeff Hovenier.

Hovenier përmes një shkrimi në rrjetin social Twitter ka thënë se sulmet e tilla si ndaj Policisë së Kosovës si ndaj personelit të sigurisë ndërkombëtare janë të papranueshme.

Duke shtuar që përgjegjësit duhet të mbajnë përgjegjësi përmes sistemit të drejtësisë kosovare.

“SHBA-ja i bashkohet EULEX-it në dënimin e fuqishëm të sulmit ndaj një patrullë të EULEX-it mbrëmë. Sulmet e dhunshme ndaj Policisë së Kosovës dhe personelit të sigurisë ndërkombëtare janë të papranueshme dhe përgjegjësit duhet të japin llogari përmes sistemit kosovar të drejtësisë”, ka shkruar Hovenier./Telegrafi/