Hoti: Unë do të udhëheq me dialogun, këtë e ka të qartë edhe presidenti Thaçi

Kryeministri i Kosovës, Avdullah Hoti, në emisionin Pressing të T7, ka treguar se kush do të udhëheqë me dialogun. Ndërkohë që tha se edhe vet presidenti Thaçi e ka të qartë këtë.

Hoti këtu përmendi Kushtetutën duke thënë se është e qarë se kompetencat e udhëheqjes së dialogut i takojnë kryeministrit të vendit. Ai madje tha se këto kompetenca nuk do t’i transferoj të askush.

“Nëse e shihni Kushtetutën është e qartë se kush udhëheqë me procesin e dialogut, këtë e ka të qartë edhe presidenti. Unë do t’i ushtroj plotësisht kompetencat e mia, nuk do t’i transferoj te askush”, është shprehur Hoti.

“Edhe presidenti e ka të qartë kush do të udhëheqë me dialogun”, tha Hoti.

Tutje, Hoti tha se agjenda e dialogut në mes të Kosovës dhe Serbisë, është plotësisht e koordinuar në mes të Bashkimit Evropian dhe Shteteve të Bashkuara të Amerikës.

“Grenell e sqaroi shumë mirë, agjendë e dialogut është plotësisht e koordinuar në mes të Bashkimit Evropian dhe Shtetet e Bashkuara të Amerikës”, është shprehur Hoti.

Tutje, ai tha se agjendën ekonomike dhe atë politike do t’i shtyjë përpara së bashku me BE’në dhe SHBA’në.

“Për neve partneret e BE’së dhe SHBA’së janë kyç. Ne duhet ta shtyjmë përpara një agjendë ekonomike e mbështetur nga SHBA’ja dhe përmes BE’së të shtyhet përpara procesi politik i dialogut”, thotë Hoti.

Në fund, Hoti kujtoi edhe Samitin e Parisit që do të ndodhë në mes të korrikut.

“Në Uashington do të sqarohen shumë gjëra, e pas Uashingtonit do të ndodhë Samiti i Parisit që do të ndodhë kah mesi i korrikut”, shtoi Hoti.