Hoti: LDK-ja e themeloi ushtrinë para 28 viteve

Në seancën e sotme të Kuvendit të Kosovës ka pasur debat të ashpër lidhur me moskrijimin e Ushtrisë së Kosovës. Ishin fillimisht kryeministri Ramush Haradinaj dhe deputeti i LDK-së, Arben Gashi ata të cilët patën një replikë të ashpër pasi që kryeministri akuzoi LDK-në që ka penguar krijimin e ushtrisë në vitin 2014.

Haradinaj tha se në vitin 2014 nga Ambasada amerikane është kërkuar që t’u vazhdohen vendet e rezervuara për serbët në një mandat një vjeçar me kusht që ata do ta votojnë Ushtrinë e Kosovës.

Por sipas Haradinajt një gjë e tillë është kundërshtuar nga LDK. Derisa Haradinaj fliste në foltore ishte deputeti Arben Gashi i cili e kundërshtoi atë çka tha Haradinaj, duke i thënë se nuk është e vërtetë dhe se Haradinaj nuk ka qenë në ato takime.

E lidhur me këtë ka folur edhe deputeti tjetër i LDK-së, Ismet Beqiri i cili deklaroi se nuk është e vërtetë që LDK ka penguar themelimin e ushtrisë së Kosovës.

“Marr përgjegjësi publike për këtë që them, asnjëherë s’ka pasur ofertë me vendet e rezervuara në këmbim të ushtrisë”, u shpreh Beqiri.

Në këtë debat rreth ushtrisë është përfshirë edhe zëvendëskryeministri i Kosovës, Enver Hoxhaj, duke thënë se është fakt i pamohueshëm që kundërshtimi i LDK-së dhe Vetëvendosjes për vendet e rezervuara të serbëve në Kuvend ka penguar formimin e ushtrisë.

Por këtu nuk mbaron i gjithë debati. Shefi i Grupit Parlamentar të LDK-së, Avdullah Hoti ka shkruar në Facebook se me vazhdimin e vendeve të rezervuara PDK-ja kishte synuar të krijojë situatën për ta qeverisur Kosovën vetëm me pakicat.

“Me vazhdimin e vendeve të rezervuara, PDK-ja ka synuar të krijojë situatën për ta qeverisur Kosovën vetëm me pakicat. Këtë sot po mundohet ta bëjë edhe Haradinaj. Por, po i shohim rezultatet. Asgjë nuk po mund të vendos pa e pyetur Vuçiq-in. Pyeteni publikisht Slobodan Petroviqin. A kanë qenë dakord deputetët serbë dakord që në këmbim të vazhdimit të vendeve të rezervuara edhe për një mandat ta votonin ndryshimin e Kushtetutës për krijimin e Ushtrisë?”, ka shkruar Hoti.

Ai tutje ka thënë se LDK-ja e ka themeluar ushtrinë para 28 viteve. “LDK-ja e ka themeluar ushtrinë para 28 viteve. LDK-së ju ka vra një ministër i Ushtrisë me 1998. Kush është pra kundër ushtrisë?!”, ka theksuar më tej Hoti. /Telegrafi