Hoti: Kurti të tregojë se ku e ka katandisur punën që e ka shtyrë SHBA-në të thotë se nuk është koha për njohje nga Serbia

Ish-kryeminstri Avdullah Hoti, ka reaguar pas deklaratës së ambasadorit amerikan në Kosovë, Jeff Hovenier, për njohjen nga Serbia.

Të martën, njohësi i çështjeve të Ballkanit, Tim Judah, duke cituar ambasadorin Hovenier, ka thënë se përderisa qëllimi përfundimtar ishte njohja reciproke e Kosovës dhe Serbisë, “për fat të keq tani nuk është e mundur”.

Kjo sipas Hovnier, pasi “sfidat e sotme ende mund të tejkalohen”.

Hoti, për këtë ka thënë se Qeveria duhet t’i tregojnë popullit ku e kanë katandisur punën që e ka shtyrë SHBA-në, aleatin kryesor Kosovës — të deklarojë se nuk është koha për njohje nga Serbia.

Tutje deputeti i LDK-së, ka pyet se çfarë ka ndodhur në marrëdhëniet e Kosovës me SHBA-në që njohja reciproke nuk është më në qendër.

“Qeveritarët duhet t’i tregojnë popullit ku e kanë katandisur punën që e ka shtyrë SHBA-në — aleatin kryesor Kosovës — të deklarojë se nuk është koha për njohje nga Serbia. Çfarë ka ndodhur në marrëdhëniet e Kosovës me SHBA-në që njohja reciproke nuk është më në qendër”, shkroi Hoti në Facebook.

Ndryshe, edhe në propozimin e njohur edhe si plani franko-gjerman, nuk përmendet njohja e ndërsjellë mes Kosovës dhe Serbisë apo anëtarësimi i Kosovës në Organizatën e Kombeve të Bashkuara – për të cilat gjëra insistojnë publikisht zyrtarët kosovarë.

Por theksohet mbështetja që palët duhet t’i japin njëra-tjetrës në procesin e integrimeve evropiane.

Nga Serbia, po ashtu, kërkohet që të mos e pengojë anëtarësimin e Kosovës në organizatat ndërkombëtare. /Telegrafi/

Shpërndaje.
© RAJONIPRESS