Hoti kërkon nga Kurti raportim për pesë pika në lidhje me dialogun

Ish-kryeministri Hoti ka kundërshtuar mënyrën se si kryeministri Kurti po kërkon të diskutohet në Kuvend për dialogun.

“Kërkesa e Kryeministrit për diskutim në Kuvendin e Kosovës të premten lidhur me ecurinë e deritanishme të dialogut është shtruar gabimisht. Raporti i dorëzuar nga Qeveria për deputetët përmban listën e marrëveshjeve të arritura gjatë dialogut teknik të viteve 2011-2017”, ka shkruar Hoti në Facebook.

Hoti thotë se dialogu tash nuk është teknik por po bëhet për marrëveshjen përfundimtare.

Deputeti i LDK-së ka përcaktuar edhe pesë pikat që sipas tij Kryeministri të premten duhet të raportojë në Kuvend.

1.për parimet mbi të cilat do të dialogohet (që në fakt paraqesin vijat e kuqe për palën kosovare),

2.për objektivat e dialogut (çfarë pritet të arrihet në fund të procesit),

3.për organizimin e palës kosovare në procesin e dialogut, për ekspertët dhe institucionet akademike që duhet përfshirë në dialog,

4.për mënyrën se si do të sigurohet transparenca dhe llogaridhënia gjatë procesit, përfshirë rolin mbikëqyrës të Kuvendit dhe qasjen në proces për shoqërinë civile dhe mediat,

5.për mënyrën si do të sigurohet mbështetja e partnerëve ndërkombëtarë në këtë proces, koordinimi me ta për objektivat e dialogut dhe përfshirja e tyre në dinamikën e dialogut.

Sipas Hotit, çdo lloj raportimi që nuk fokusohet në këto pika është përsëritje se seancave të mëparshme të organizuara gjatë dialogut teknik.

“Është tepër me rëndësi të kemi qëndrim të qartë nga Qeveria për këto çështje dhe të ndërtojmë konsensusin e nevojshëm politik dhe shoqërorë për të përmbyllur këtë proces tani kur është krijuar momentumi i nevojshëm dhe kur ekziston qëndrimi i qartë i partnerëve kyç në kuadër të BE-së dhe i SHBA-së”, ka shkruar më tej Hoti./Telegrafi/

Shpërndaje.
© RAJONIPRESS