Hoti i përgjigjet Veselit rreth akuzave për qyqarllëk

Kryetari i Kuvendit të Kosovës, njëherësh edhe kryetari i PDK-së, Kadri Veseli, në një intervistë për Telegrafin me gazetarin Muhamet Hajrullahu, duke folur për dialogun me Serbinë, ka thënë se është për dhembshuri sjellja e opozitës, duke i quajtur veprimet e tyre qyqarllëk.

“Po flas për LDK-në dhe VV-në, një mëri dhe një inat e cila është e paarsyeshme. Si mendoni të ecë Kosova me mentalitet bllokues, me mentalitet inatçor, frikacakut me mentalitet qyqar”, ka thënë Veseli.

E për këtë, i menjëhershëm ka qenë reagimi i Lidhjes Demokratike të Kosovës.

Shefi i Grupit parlamentar i LDK-së , Avdullah Hoti, përmes një shkrimi në Facebook, duke iu drejtuar Veselit ka thënë se, qyqarllëk është mos gatishmëria e koalicionit PAN, pa shumicë parlamentare tash e gjashtë muaj, për t’u përballur me qytetarët.

“Qyqarllëk është të mbeten të hapura të 11 seancat e Kuvendit të sesionit vjeshtor nga data 13 shtator e këndej. Qyqarllëk është ikja e koalicionit PAN nga Kuvendi për të mos u përballur me opozitën”, ka shkruar Hoti.

Ndërkaq, gjatë intervistës duke folur për dialogun, Veseli ka theksuar se grupi negociator së bashku me bartësit e institucioneve është duke punuar shumë mirë, dhe e ka të qartë vizionin se përse shkojnë në dialog.

Sipas tij, qëllimi është i qartë në këtë proces, e ai është shteti i Kosovës, dhe se finalja e dialogut do të jetë njohja e pavarësisë së Kosovës nga Serbia./Telegrafi