Anëtari i Kryesisë së Lidhjes Demokratike të Kosovës, Avdullah Hoti, i është përgjigjur kryeministrit të Kosovës në detyrë, Albin Kurtit, i cili tha se dikush po do gjakderdhje në Veri për t’i hapur shampanjat e ndarjes së Kosovës. Sipas Hotit, të gjitha problemet do të zgjidhen me mjete politike.
“Këto ditë është përmendur shpesh fjala “gjakderdhje” nga disa politikanë, aq shumë saqë është bërë term i përdorur edhe në diskutime të problemeve financiare dhe ekonomike. Për fat të mirë, populli i Kosovës e ka kaluar kohën e gjakderdhjes. Nuk do të ketë asnjë gjakderdhje tjetër”, ka shkruar Hoti në Facebook.
Ai po thotë se të gjitha problemet do të zgjidhen me mjete politike.
Të gjitha çështjet e pazgjidhura në politikën e brendshme dhe të jashtme, sado të vështira të jenë, do të zgjidhen me mjete politike, demokratike e kushtetuese. Këtë e sigurojmë ne, dhe ndjehemi besimplotë në këtë lloj qasje të zgjidhjes së çështjeve të hapura politike, sepse kështu na sigurojnë miqtë tanë euroatlantik”, shkruan Hoti.
Ndërkohë, ai thotë se në Kosovë ka politikanë të cilët termin gjakderdhje po e përdorin për të arritur qëllimet e tyre politike.
“Por, për fat të keq ende mbijetojnë politikanë në Kosovës që në projektet e tyre të garës politike zë vend termi “gjakderdhje” në kuadër të përpjekjeve për arritje të qëllimeve të tyre politike”, ka shkruar Hoti.
Këto komente të Hotit vijnë pas publikimit të një videoje nga kryeministri i Kosovës në detyrë, Albin Kurti, ku tha se politikanë në Serbi e Kosovë dëshirojnë konflikt në Veri të Kosovës për të realizuar planin për shkëmbim territorial.
“Ata duan të provokojnë tensione sepse ata duan incidente. Sepse projekti i tyre për shkëmbim territorial sikur të realizohej do të shkaktonte konflikte e gjakderdhje të reja. Ai projekt dështoi. Tash duan konlifkte e gjakderdhje në terren për t’u rikthyer te shkëmbimi e ndarja e Kosovës”, ka thënë ai.
Kurti ka thënë se edhe ideja për gjendje të jashtëzakonshme është në funksion të kësaj ideje.
Ai ka bërë thirrje qytetarëve të ruajnë gjakftohtësinë.
“Ruajeni gjakftohtësinë dhe mos bini në kurthin e atyre, të cilët për t’i zbrazur shampajnat e tyre kanë nevojë të derdhet gjaku jonë. Mos bini në provokime. Ato janë kurthi që do të bien vetë ata”, ka shtuar ai.
Kurti ka bërë thirrje kryetarëve të dy Mitrovicave që mos të tensionojnë situatën.
“Atyre që kontribuan për ndarjen e Mitrovicës mos ju besoni”, ka shtuar ai.
