Hoti falënderon BE-në për mbështetje në menaxhimin e pandemisë COVID-19

Kryeministri i vendit, Avdullah Hoti, ka falënderuar për gatishmëri institucionet e Bashkimit Evropian, që vazhdojnë mbështetjen e pakursyer për institucionet dhe qytetarët e Kosovës në menaxhimin e krizës, të cilën e ka shkaktuar pandemia COVID-19.

Në një njoftim për media, bëhet e ditur se Hoti mirëpret deklaratat e Komisionarit për Fqinjësi dhe Zgjerim, Oliver Varhelyi, të shprehur në një videokonferencë me përfaqësues të qeverive të vendeve të Ballkanit Perëndimor, në të cilën ai ka thënë se BE-ja po sigurohet që vaksinat kundër COVID-19 të jenë të gatshme për vendet e këtij rajoni në të njëjtën kohë kur do të fillojnë të arrijnë në vendet e BE-së.

“Komisionari Varhelyi në këtë takim ka vënë theksin te rëndësia e bashkëpunimit për të tejkaluar pandeminë dhe gatishmërinë e institucioneve të BE-së që të ndihmojnë vendet fqinje, ashtu siç i quan vendet e Ballkanit Perëndimor, ku thekson se e ardhmja e këtyre vendeve është në Bashkimin Evropian”, thuhet në komunikatë. /Zëri/