Hoti e rikonfirmon, LDK pro Demarkacionit

Shefi i Grupit Parlamentar të LDK-së, Avdullah Hoti është shprehur i bindur se nesër Kuvendi duhet të ratifikojë marrëveshjen e vitit 2015.

“Mbledhja sapo përfundoj për seancën e nesërme në ora 11:00, LDK është me qëndrimin e njëjtë që e kemi pas tash e dy vite që kjo marrëveshje është në të mirë të qytetarëve për rrugën e perspektivës evropiane të Kosovës. Na vjen keq që koalicioni nuk ka ende votat për ta quar përpara këtë marrëveshje dhe ende s’janë unik për të quar përpara këtë marrëveshje. Tashmë seanca është caktuar dhe nuk janë ende unik si koalicion qeverisës për ta quar përpara këtë çështje shumë të rëndësishme për vendin. Më vjen mirë që disa prej partive, kanë reflektuar që kjo marrëveshje është në të mirë të qytetarëve, si dhe konsolidon shtetësinë e Kosovës”,ka thënë Hoti.

Ai ka shtuar se të gjithë deputetët e LDK-së do të jenë në seancë nesër.

“Ne jemi unik dhe 27 deputetë sa jemi do të paraqitemi në seancë dhe do të kërkojmë sqarime shtesë për projektligjin që ratifikon këtë marrëveshje”, ka thënë Hoti.

Ai ka shtuar se nesër Kuvendi duhet dhe do ta ratifikojë marrëveshjen e nënshkruar në vitin 2015.

Hoti tha se edhe raporti i Bulliqit edhe aneks marrëveshja janë bërë për t’ia ruajtur fytyrën e kryeministrit. /Telegrafi/