Hobi në fotografi e bën yll shqiptarin

Fotografi shqiptar, Admir Saiti, nga Weggisi i Zvicrës ka fotografuar një javë rresht në New York bashkë me Fadil Berishen, fotografin kosovar me famë botërore.

28-vjeçari me origjinë nga Kumanova e Maqedonisë bën fotografi qe 10 vjet në Zvicër. Por, në shtator ai ka arritur kulmin në karrierë duke qenë mysafir i Fadil Berishës, fotografit të njohur të konkursit të bukurisë Miss Universe dhe Miss SHBA.

“Fadil Berishën e kam shoqëruar për 1 javë në New York në çdo klik të aparatit të tij. Kam mësuar shumë nga ai, sidomos rreth planifikimit profesional për fotografi (shooting). Nga afër e kam parë se si shkojnë punët atje në New York, ku është edhe bota e artit të fotografisë”, tha në një prononcim për albinfo.ch fotografi Admir Saiti, pas kthimin nga New Yorku.

Admiri në New York ka realizuar disa fotografi profesionale në shoqërim me Fadil Berishën.

Fotografi nga Zvicra kishte bërë fotografi me Misin e Kosovën, Diana Avdiu, pastaj me Myriam Schöpf, modelen e njohur nga firmat e njohura, si Emmi Trumpf.

Ai është kthyer me përshtypje të mira nga Nju-Jorku. “Atje në New York shumë njerëz shprehnin dëshirën për të ndihmuar. Ne e kemi edhe Cyrihun që është njëri nga qytetet e mëdha, po si New Yorku ende nuk kam përjetuar”, thotë Saiti.

Fotografi shqiptar ishte impresionuar atje me njërin prej spektakleve të modës të disenjatores së njohur të modës Sherri Hill në Trump Tower. Admir Saiti është fotograf shumë i njohur dhe i kërkuar në Zvicër.

“Suksesi më i madh imi janë edhe 4 seritë e fotografive të realizuara për “Swarovski” dhe njëra prej tyre është zgjedhur për katalog”, tha Admiri.

Admiri ka realizuar foto të bukura dhe artistike, por njëkohësisht ka punuar dhe punon edhe me modele të njohura.

Dalëngadalë nga hobi fotografimi po i bëhet profesion kumanovarit në Zvicër. Ai është shumë aktiv në fushën e modës, spektakleve të bukurisë dhe reklamave. “Do ta perfeksionoj punën time me fotografi që një ditë hobin ta shndërroj në profesion”, tha Admiri, i cili është menaxher i shitjes në një firmë zvicerane të distribuimit./albinfo/